اس قدر مسلسل تھیں شدتیں جدائی کی — احمد فراز
شاعر
اس قدر مسلسل تھیں شدتیں جدائی کی
اس قدر مسلسل تھیں شدتیں جدائی کی
آج پہلی بار اس سے میں نے بے وفائی کی
ورنہ اب تلک یوں تھا خواہشوں کی بارش میں
یا تو ٹوٹ کر رویا یا غزل سرائی کی
تج دیا تھا کل جن کو ہم نے تیری چاہت میں
آج ان سے مجبوراً تازہ آشنائی کی
ہو چلا تھا جب مجھ کو اختلاف اپنے سے
تو نے کس گھڑی ظالم میری ہم نوائی کی
ترک کر چکے قاصد کوئے نامراداں کو
کون اب خبر لاوے شہر آشنائی کی
طنز و طعنہ و تہمت سب ہنر ہیں ناصح کے
آپ سے کوئی پوچھے ہم نے کیا برائی کی
پھر قفس میں شور اٹھا قیدیوں کا اور صیاد
دیکھنا اڑا دے گا پھر خبر رہائی کی
دکھ ہوا جب اس در پر کل فرازؔ کو دیکھا
لاکھ عیب تھے اس میں خو نہ تھی گدائی کی
Is qadar musalsal thin shiddaten judai ki
Is qadar musalsal thin shiddaten judai ki
Aaj pehli bar us se main ne bewafai ki
Warna ab talak yun tha khwahishon ki barish mein
Ya to toot kar roya ya ghazal sarai ki
Taj diya tha kal jin ko hum ne teri chahat mein
Aaj un se majbooran taza ashnaai ki
Ho chala tha jab mujh ko ikhtilaf apne se
Tu ne kis ghadi zalim meri hamnawaai ki
Tark kar chuke qasid koo-e-namuradan ko
Kaun ab khabar laawe shehr-e-ashnaai ki
Tanz-o-taana-o-tohmat sab hunar hain naseh ke
Aap se koi pooche hum ne kya burai ki
Phir qafas mein shor utha qaediyon ka aur sayyad
Dekhna uda dega phir khabar rihayi ki
Dukh hua jab us dar par kal Faraz ko dekha
Lakh aib the us mein kho na thi gadai ki
شاعر کے بارے میں
ِاحمد فراز، اصل نام سید احمد شاہ، 12 جنوری 1931ء کو نوشہرہ میں پیدا ہوئے۔ ان کے والدسید محمد شاہ برق خود استاد اور فارسی شاعر تھے،احمد فراز ابتدائی...
مکمل تعارف پڑھیں