دل سے خیال دوست بھلایا نہ جائے گا — الطاف حسین حالی
شاعر
دل سے خیال دوست بھلایا نہ جائے گا
دل سے خیال دوست بھلایا نہ جائے گا
سینے میں داغ ہے کہ مٹایا نہ جائے گا
تم کو ہزار شرم سہی مجھ کو لاکھ ضبط
الفت وہ راز ہے کہ چھپایا نہ جائے گا
اے دل رضائے غیر ہے شرط رضائے دوست
زنہار بار عشق اٹھایا نہ جائے گا
دیکھی ہیں ایسی ان کی بہت مہربانیاں
اب ہم سے منہ میں موت کے جایا نہ جائے گا
مے تند و ظرف حوصلۂ اہل بزم تنگ
ساقی سے جام بھر کے پلایا نہ جائے گا
راضی ہیں ہم کہ دوست سے ہو دشمنی مگر
دشمن کو ہم سے دوست بنایا نہ جائے گا
کیوں چھیڑتے ہو ذکر نہ ملنے کا رات کے
پوچھیں گے ہم سبب تو بتایا نہ جائے گا
بگڑیں نہ بات بات پہ کیوں جانتے ہیں وہ
ہم وہ نہیں کہ ہم کو منایا نہ جائے گا
ملنا ہے آپ سے تو نہیں حصر غیر پر
کس کس سے اختلاط بڑھایا نہ جائے گا
مقصود اپنا کچھ نہ کھلا لیکن اس قدر
یعنی وہ ڈھونڈتے ہیں جو پایا نہ جائے گا
جھگڑوں میں اہل دیں کے نہ حالیؔ پڑیں بس آپ
قصہ حضور سے یہ چکایا نہ جائے گا
Dil se khayal-e-dost bhulaya na jayega
Dil se khayal-e-dost bhulaya na jayega
Seene mein daagh hai ke mitaya na jayega
Tum ko hazaar sharm sahi mujh ko laakh zabt
Ulfat woh raaz hai ke chhupaya na jayega
Ae dil raza-e-ghair hai shart raza-e-dost
Zinhar baar-e-ishq uthaya na jayega
Dekhi hain aisi un ki bahut meherbaniyan
Ab hum se munh mein maut ke jaya na jayega
Mai tund-o-zarf-e-hausla-e-ahl-e-bazm tang
Saqi se jaam bhar ke pilaya na jayega
Raazi hain hum ke dost se ho dushmani magar
Dushman ko hum se dost banaya na jayega
Kyun chhedte ho zikr na milne ka raat ke
Poochhenge hum sabab toh bataya na jayega
Bigden na baat baat pe kyun jaante hain woh
Hum woh nahin ke hum ko manaya na jayega
Milna hai aap se toh nahin hasr ghair par
Kis kis se ikhtilaat badhaya na jayega
Maqsood apna kuch na khula lekin is qadar
Yaani woh dhundhte hain jo paaya na jayega
Jhagdron mein ahl-e-deen ke na Hali! paden bas aap
Qissa huzoor se yeh chakaya na jayega