گھر ہے وحشت خیز اور بستی اجاڑ — الطاف حسین حالی
شاعر
گھر ہے وحشت خیز اور بستی اجاڑ
گھر ہے وحشت خیز اور بستی اجاڑ
ہو گئی ایک اک گھڑی تجھ بن پہاڑ
آج تک قصر امل ہے ناتمام
بندھ چکی ہے بارہا کھل کھل کے پاڑ
ہے پہنچنا اپنا چوٹی تک محال
اے طلب نکلا بہت اونچا پہاڑ
کھیلنا آتا ہے ہم کو بھی شکار
پر نہیں زاہد کوئی ٹٹی کی آڑ
دل نہیں روشن تو ہیں کس کام کے
سو شبستاں میں اگر روشن ہیں جھاڑ
عید اور نوروز ہے سب دل کے ساتھ
دل نہیں حاضر تو دنیا ہے اجاڑ
کھیت رستے پر ہے اور رہ رو سوار
کشت ہے سرسبز اور نیچی ہے باڑ
بات واعظ کی کوئی پکڑی گئی
ان دنوں کم تر ہے کچھ ہم پر لتاڑ
تم نے حالیؔ کھول کر ناحق زباں
کر لیا ساری خدائی سے بگاڑ
Ghar hai wahshat-khez aur basti ujaad
Ghar hai wahshat-khez aur basti ujaad
Ho gayi ek ek ghadi tujh bin pahaad
Aaj tak qasr-e-amal hai na-tamaam
Bandh chuki hai barha khul khul ke paad
Hai pahunchna apna choti tak muhaal
Aye talab nikla bahut uncha pahaad
Khelna aata hai hum ko bhi shikaar
Par nahin zahid koi tatti ki aad
Dil nahin roshan toh hain kis kaam ke
Sau shabistan mein agar roshan hain jhaad
Eid aur Nauroz hai sab dil ke saath
Dil nahin haazir toh duniya hai ujaad
Khet raste par hai aur reh-rau sawar
Kasht hai sar-sabz aur neechi hai baadh
Baat wa'iz ki koi pakdi gayi
In dino kamtar hai kuch hum par lataad
Tum ne Hali! khol kar nahaq zuban
Kar liya saari khudayi se bigaad