گو جوانی میں تھی کج رائی بہت — الطاف حسین حالی
شاعر
گو جوانی میں تھی کج رائی بہت
گو جوانی میں تھی کج رائی بہت
پر جوانی ہم کو یاد آئی بہت
زیر برقع تو نے کیا دکھلا دیا
جمع ہیں ہر سو تماشائی بہت
ہٹ پہ اس کی اور پس جاتے ہیں دل
راس ہے کچھ اس کو خود رائی بہت
سرو یا گل آنکھ میں جچتے نہیں
دل پہ ہے نقش اس کی رعنائی بہت
چور تھا زخموں میں اور کہتا تھا دل
راحت اس تکلیف میں پائی بہت
آ رہی ہے چاہ یوسف سے صدا
دوست یاں تھوڑے ہیں اور بھائی بہت
وصل کے ہو ہو کے ساماں رہ گئے
مینہ نہ برسا اور گھٹا چھائی بہت
جاں نثاری پر وہ بول اٹھے مری
ہیں فدائی کم تماشائی بہت
ہم نے ہر ادنیٰ کو آلا کر دیا
خاکساری اپنی کام آئی بہت
کر دیا چپ واقعات دہر نے
تھی کبھی ہم میں بھی گویائی بہت
گھٹ گئیں خود تلخیاں ایام کی
یا گئی کچھ بڑھ شکیبائی بہت
ہم نہ کہتے تھے کہ حالیؔ چپ رہو
راست گوئی میں ہے رسوائی بہت
Go jawani mein thi kaj-raai bahut
Go jawani mein thi kaj-raai bahut
Par jawani hum ko yaad aayi bahut
Zer-e-burqa tu ne kya dikhla diya
Jama hain har soo tamashayi bahut
Hat pe us ki aur pas jaate hain dil
Raas hai kuch us ko khud-raai bahut
Sarv ya gul aankh mein jachte nahin
Dil pe hai naqsh us ki ra'anai bahut
Choor tha zakhmon mein aur kehta tha dil
Rahat is takleef mein payi bahut
Aa rahi hai chah-e-Yusuf se sada
Dost yaan thode hain aur bhai bahut
Wasl ke ho ho ke samaan reh gaye
Meeh na barsa aur ghata chhāyi bahut
Jaan nisari par woh bol uthe meri
Hain fidai kam tamashayi bahut
Hum ne har adna ko aala kar diya
Khaaksari apni kaam aayi bahut
Kar diya chup waqeat-e-dahr ne
Thi kabhi hum mein bhi goyayi bahut
Ghat gayin khud talkhiyan-e-ayyam ki
Ya gayi kuch badh shikebayi bahut
Hum na kehte the ke Hali! chup raho
Raast-goyi mein hai ruswayi bahut