جیتے جی موت کے تم منہ میں نہ جانا ہرگز — الطاف حسین حالی
شاعر
جیتے جی موت کے تم منہ میں نہ جانا ہرگز
جیتے جی موت کے تم منہ میں نہ جانا ہرگز
دوستو دل نہ لگانا نہ لگانا ہرگز
عشق بھی تاک میں بیٹھا ہے نظر بازوں کی
دیکھنا شیر سے آنکھیں نہ لڑانا ہرگز
ہاتھ ملنے نہ ہوں پیری میں اگر حسرت سے
تو جوانی میں نہ یہ روگ بسانا ہرگز
جتنے رستے تھے ترے ہو گئے ویراں اے عشق
آ کے ویرانوں میں اب گھر نہ بسانا ہرگز
کوچ سب کر گئے دلی سے ترے قدر شناس
قدر یاں رہ کے اب اپنی نہ گنوانا ہرگز
تذکرہ دہلی مرحوم کا اے دوست نہ چھیڑ
نہ سنا جائے گا ہم سے یہ فسانہ ہرگز
ڈھونڈتا ہے دل شوریدہ بہانے مطرب
دردانگیز غزل کوئی نہ گانا ہرگز
صحبتیں اگلی مصور ہمیں یاد آئیں گی
کوئی دلچسپ مرقع نہ دکھانا ہرگز
لے کے داغ آئے گا سینے پہ بہت اے سیاح
دیکھ اس شہر کے کھنڈروں میں نہ جانا ہرگز
چپے چپے پہ ہیں یاں گوہر یکتا تہ خاک
دفن ہوگا کہیں اتنا نہ خزانہ ہرگز
مٹ گئے تیرے مٹانے کے نشاں بھی اب تو
اے فلک اس سے زیادہ نہ مٹانا ہرگز
وہ تو بھولے تھے ہمیں ہم بھی انہیں بھول گئے
ایسا بدلا ہے نہ بدلے گا زمانہ ہرگز
ہم کو گر تو نے رلایا تو رلایا اے چرخ
ہم پہ غیروں کو تو ظالم نہ ہنسانا ہرگز
آخری دور میں بھی تجھ کو قسم ہے ساقی
بھر کے اک جام نہ پیاسوں کو پلانا ہرگز
بخت سوئے ہیں بہت جاگ کے اے دور زماں
نہ ابھی نیند کے ماتوں کو جگانا ہرگز
کبھی اے علم و ہنر گھر تھا تمہارا دلی
ہم کو بھولے ہو تو گھر بھول نہ جانا ہرگز
شاعری مر چکی اب زندہ نہ ہوگی یارو
یاد کر کر کے اسے جی نہ کڑھانا ہرگز
غالبؔ و شیفتہؔ و نیرؔ و آزردہؔ و ذوقؔ
اب دکھائے گا یہ شکلیں نہ زمانا ہرگز
مومنؔ و علویؔ و صہبائیؔ و ممنوںؔ کے بعد
شعر کا نام نہ لے گا کوئی دانا ہرگز
کر دیا مر کے یگانوں نے یگانہ ہم کو
ورنہ یاں کوئی نہ تھا ہم میں یگانہ ہرگز
داغؔ و مجروحؔ کو سن لو کہ پھر اس گلشن میں
نہ سنے گا کوئی بلبل کا ترانہ ہرگز
رات آخر ہوئی اور بزم ہوئی زیر و زبر
اب نہ دیکھو گے کبھی لطف شبانہ ہرگز
بزم ماتم تو نہیں بزم سخن ہے حالیؔ
یاں مناسب نہیں رو رو کے رلانا ہرگز
jīte jī maut ke tum muñh meñ na jānā hargiz
jīte jī maut ke tum muñh meñ na jānā hargiz
dosto dil na lagānā na lagānā hargiz
ishq bhī tāq meñ baiṭhā hai nazar-bāzoñ kī
dekhnā sher se āñkheñ na laṛānā hargiz
hāth milne na hoñ pīrī meñ agar hasrat se
to javānī meñ na ye rog basānā hargiz
jitne raste the tire ho ga'e vīrāñ ai ishq
ā ke vīrānoñ meñ ab ghar na basānā hargiz
kūch sab kar ga'e Dillī se tire qadr-shinās
qadr yāñ rah ke ab apnī na gañvānā hargiz
tazkira-e-Dihlī-e-marhūm kā ai dost na chheṛ
na sunā jā'e gā ham se ye fasāna hargiz
ḍhūnḍhtā hai dil-e-shorīda bahāne mutrib
dard-aṅgez ġhazal ko'ī na gānā hargiz
sohbateñ aglī musavvir hameñ yād ā'eñgī
ko'ī dilchasp muraqqa' na dikhānā hargiz
le ke dāġh ā'e gā sīne pe bahut ai sayyāh
dekh is shahar ke khañḍaroñ meñ na jānā hargiz
chappe chappe pe haiñ yāñ gauhar-e-yaktā tah-e-ḳhāk
dafn hogā kahīñ itnā na ḳhazāna hargiz
miṭ ga'e tere miṭāne ke nishāñ bhī ab to
ai falak is se ziyāda na miṭānā hargiz
vo to bhūle the hameñ ham bhī unheñ bhūl ga'e
aisā badlā hai na badlegā zamāna hargiz
ham ko gar tū ne rulāyā to rulāyā ai charḳh
ham pe ġhairoñ ko tū zālim na hansānā hargiz
āḳhirī daur meñ bhī tujh ko qasam hai sāqī
bhar ke ik jām na piyāsoñ ko pilānā hargiz
baḳht so'e haiñ bahut jāg ke ai daur-e-zamāñ
na abhī nīñd ke mātoñ ko jagānā hargiz
kabhī ai ilm-o-hunar ghar thā tumhārā Dillī
ham ko bhūle ho to ghar bhūl na jānā hargiz
shā'irī mar chukī ab zinda na hogī yāro
yād kar kar ke use jī na kaṛhānā hargiz
Ghalib-o-Shaifta-o-Nair-o-Āzurda-o-Zauq
ab dikhā'e gā ye shakleñ na zamāna hargiz
Momin-o-Alvī-o-Sahbā'ī-o-Mamnoon ke ba'd
shi'r kā nām na le gā ko'ī dānā hargiz
kar diyā mar ke yagānoñ ne yagāna ham ko
varna yāñ ko'ī na thā ham meñ yagāna hargiz
Dāġh-o-Majrūh ko sun lo ki phir is gulshan meñ
na sunegā ko'ī bulbul kā tarāna hargiz
rāt ākhir hu'ī aur bazm hu'ī zer-o-zabar
ab na dekhoge kabhī lutf-e-shabāna hargiz
bazm-e-mātam to nahīñ bazm-e-suḳhan hai Hālī
yāñ munāsib nahīñ ro ro ke rulānā hargiz