کبک و قمری میں ہے جھگڑا کہ چمن کس کا ہے — الطاف حسین حالی
شاعر
کبک و قمری میں ہے جھگڑا کہ چمن کس کا ہے
کبک و قمری میں ہے جھگڑا کہ چمن کس کا ہے
کل بتا دے گی خزاں یہ کہ وطن کس کا ہے
فیصلہ گردش دوراں نے کیا ہے سو بار
مرو کس کا ہے بدخشان و ختن کس کا ہے
دم سے یوسف کے جب آباد تھا یعقوب کا گھر
چرخ کہتا تھا کہ یہ بیت حزن کس کا ہے
مطمئن اس سے مسلماں نہ مسیحی نہ یہود
دوست کیا جانئے یہ چرخ کہن کس کا ہے
واعظ اک عیب سے تو پاک ہے یا ذات خدا
ورنہ بے عیب زمانہ میں چلن کس کا ہے
آج کچھ اور دنوں سے ہے سوا استغراق
عزم تسخیر پھر اے شیخ زمن کس کا ہے
آنکھ پڑتی ہے ہر اک اہل نظر کی تم پر
تم میں روپ اے گل و نسرین و سمن کس کا ہے
عشق ادھر عقل ادھر دھن میں چلے ہیں تیری
رستہ اب دیکھیے دونوں میں کٹھن کس کا ہے
شان دیکھی نہیں گر تو نے چمن میں اس کی
ولولہ تجھ میں یہ اے مرغ چمن کس کا ہے
ہیں فصاحت میں مثل واعظ و حالیؔ دونوں
دیکھنا یہ ہے کہ بے لاگ سخن کس کا ہے
kabk-o-qumrī meñ hai jhagaṛā ki chaman kis kā hai
kabk-o-qumrī meñ hai jhagaṛā ki chaman kis kā hai
kal batā degī ḳhizāñ ye ki watan kis kā hai
faiṣla gardish-e-daurāñ ne kiyā hai sau bār
maro kis kā hai Badakhshāñ-o-Khatan kis kā hai
dam se Yūsuf ke jab ābād thā Ya'qūb kā ghar
charḳh kahtā thā ki ye bait-e-huzn kis kā hai
mutma'in is se musalmāñ na masīhī na Yahūd
dost kyā jāniye ye charḳh-e-kuhan kis kā hai
vā'iz ik aib se tū pāk hai yā zāt-e-ḳhudā
varna be-aib zamāne meñ chalan kis kā hai
āj kuchh aur dinoñ se hai sivā istiġhrāq
azm-e-tasḳhīr phir ai shaiḳh-e-zaman kis kā hai
āñkh paṛtī hai har ik ahl-e-nazar kī tum par
tum meñ rūp ai gul-o-nasrīn-o-saman kis kā hai
ishq idhar aql idhar dhan meñ chale haiñ terī
rasta ab dekhiye donoñ meñ kaṭhin kis kā hai
shān dekhī nahīñ gar tū ne chaman meñ us kī
valvala tujh meñ ye ai murġh-e-chaman kis kā hai
haiñ faṣāhat meñ misl-e-vā'iz-o-Hālī donoñ
dekhnā ye hai ki be-lāg suḳhan kis kā hai