دل پریشان ہوا جاتا ہے — داغ دہلوی
شاعر
دل پریشان ہوا جاتا ہے
دل پریشان ہوا جاتا ہے
اور سامان ہوا جاتا ہے
خدمت پیر مغاں کر زاہد
تو اب انسان ہوا جاتا ہے
موت سے پہلے مجھے قتل کرو
اس کا احسان ہوا جاتا ہے
لذت عشق الٰہی مٹ جائے
درد ارمان ہوا جاتا ہے
دم ذرا لو کہ مرا دم تم پر
ابھی قربان ہوا جاتا ہے
گریہ کیا ضبط کروں اے ناصح
اشک پیمان ہوا جاتا ہے
بے وفائی سے بھی رفتہ رفتہ
وہ مری جان ہوا جاتا ہے
عرصۂ حشر میں وہ آ پہنچے
صاف میدان ہوا جاتا ہے
مدد اے ہمت دشوارپسند
کام آسان ہوا جاتا ہے
چھائی جاتی ہے یہ وحشت کیسی
گھر بیابان ہوا جاتا ہے
شکوہ سن آنکھ ملا کر ظالم
کیوں پشیمان ہوا جاتا ہے
آتش شوق بجھی جاتی ہے
خاک ارمان ہوا جاتا ہے
عذر جانے میں نہ کر اے قاصد
تو بھی نادان ہوا جاتا ہے
مضطرب کیوں نہ ہوں ارماں دل میں
قید مہمان ہوا جاتا ہے
داغؔ خاموش نہ لگ جائے نظر
شعر دیوان ہوا جاتا ہے
Dil pareshan hua jaata hai
Dil pareshan hua jaata hai
Aur samaan hua jaata hai
Khidmat-e-peer-e-mughan kar zaahid
Tu ab insaan hua jaata hai
Maut se pehle mujhe qatl karo
Is ka ehsaan hua jaata hai
Lazzat-e-ishq-e-ilaahi mit jaaye
Dard armaan hua jaata hai
Dam zara lo ke mera dam tum par
Abhi qurban hua jaata hai
Girya kya zabt karoon ai naasih
Ashk paimaan hua jaata hai
Bewafaai se bhi rafta rafta
Woh meri jaan hua jaata hai
Arsa-e-hashr mein woh aa pahunche
Saaf maidaan hua jaata hai
Madad ai himmat-e-dushwar-pasand
Kaam aasaan hua jaata hai
Chhaai jaati hai yeh wahshat kaisi
Ghar biyaban hua jaata hai
Shikwa sun aankh mila kar zaalim
Kyun pashemaan hua jaata hai
Aatish-e-shauq bujhi jaati hai
Khaak armaan hua jaata hai
Uzr jaane mein na kar ai qaasid
Tu bhi nadan hua jaata hai
Muztarib kyun na hon armaan dil mein
Qaid mehmaan hua jaata hai
Daagh khamosh na lag jaaye nazar
Sher deewan hua jaata hai
شاعر کے بارے میں
جس کی غزلوں نے اردو زبان کو محبت کی مٹھاس، لہجے کی نزاکت اور بیان کی شوخی بخشی نواب مرزا خان داغ دہلوی۔ 25مئی 1831 کو دہلی میں پیدا ہونے والے داغ...
مکمل تعارف پڑھیں