غیر کو منہ لگا کے دیکھ لیا — داغ دہلوی
شاعر
غیر کو منہ لگا کے دیکھ لیا
غیر کو منہ لگا کے دیکھ لیا
جھوٹ سچ آزما کے دیکھ لیا
ان کے گھر داغؔ جا کے دیکھ لیا
دل کے کہنے میں آ کے دیکھ لیا
کتنی فرحت فزا تھی بوئے وفا
اس نے دل کو جلا کے دیکھ لیا
کبھی غش میں رہا شب وعدہ
کبھی گردن اٹھا کے دیکھ لیا
جنس دل ہے یہ وہ نہیں سودا
ہر جگہ سے منگا کے دیکھ لیا
لوگ کہتے ہیں چپ لگی ہے تجھے
حال دل بھی سنا کے دیکھ لیا
جاؤ بھی کیا کرو گے مہر و وفا
بارہا آزما کے دیکھ لیا
زخم دل میں نہیں ہے قطرۂ خوں
خوب ہم نے دکھا کے دیکھ لیا
ادھر آئینہ ہے ادھر دل ہے
جس کو چاہا اٹھا کے دیکھ لیا
ان کو خلوت سرا میں بے پردہ
صاف میدان پا کے دیکھ لیا
اس نے صبح شب وصال مجھے
جاتے جاتے بھی آ کے دیکھ لیا
تم کو ہے وصل غیر سے انکار
اور جو ہم نے آ کے دیکھ لیا
داغؔ نے خوب عاشقی کا مزا
جل کے دیکھا جلا کے دیکھ لیا
Ghair ko munh laga ke dekh liya
Ghair ko munh laga ke dekh liya
Jhoot sach aazma ke dekh liya
Un ke ghar Daagh ja ke dekh liya
Dil ke kehne mein aa ke dekh liya
Kitni farhat-faza thi boo-e-wafa
Us ne dil ko jala ke dekh liya
Kabhi ghish mein raha shab-e-wada
Kabhi gardan utha ke dekh liya
Jins-e-dil hai yeh woh nahin sauda
Har jagah se manga ke dekh liya
Log kehte hain chup lagi hai tujhe
Haal-e-dil bhi suna ke dekh liya
Jaao bhi kya karoge mehr-o-wafa
Barha aazma ke dekh liya
Zakhm-e-dil mein nahin hai qatra-e-khoon
Khoob hum ne dikha ke dekh liya
Idhar aaina hai udhar dil hai
Jis ko chaha utha ke dekh liya
Un ko khalwat-sara mein be-parda
Saaf maidaan pa ke dekh liya
Us ne subh-e-shab-e-wisaal mujhe
Jaate jaate bhi aa ke dekh liya
Tum ko hai wasl-e-ghair se inkar
Aur jo hum ne aa ke dekh liya
Daagh ne khoob aashiqi ka maza
Jal ke dekha jala ke dekh liya
شاعر کے بارے میں
جس کی غزلوں نے اردو زبان کو محبت کی مٹھاس، لہجے کی نزاکت اور بیان کی شوخی بخشی نواب مرزا خان داغ دہلوی۔ 25مئی 1831 کو دہلی میں پیدا ہونے والے داغ...
مکمل تعارف پڑھیں