اس نہیں کا کوئی علاج نہیں — داغ دہلوی
شاعر
اس نہیں کا کوئی علاج نہیں
اس نہیں کا کوئی علاج نہیں
روز کہتے ہیں آپ آج نہیں
کل جو تھا آج وہ مزاج نہیں
اس تلون کا کچھ علاج نہیں
آئنہ دیکھتے ہی اترائے
پھر یہ کیا ہے اگر مزاج نہیں
لے کے دل رکھ لو کام آئے گا
گو ابھی تم کو احتیاج نہیں
ہو سکیں ہم مزاج داں کیونکر
ہم کو ملتا ترا مزاج نہیں
چپ لگی لعل جاں فزا کو ترے
اس مسیحا کا کچھ علاج نہیں
دل بے مدعا خدا نے دیا
اب کسی شے کی احتیاج نہیں
کھوٹے داموں میں یہ بھی کیا ٹھہرا
درہم داغ کا رواج نہیں
بے نیازی کی شان کہتی ہے
بندگی کی کچھ احتیاج نہیں
دل لگی کیجئے رقیبوں سے
اس طرح کا مرا مزاج نہیں
عشق ہے پادشاہ عالم گیر
گرچہ ظاہر میں تخت و تاج نہیں
درد فرقت کی گو دوا ہے وصال
اس کے قابل بھی ہر مزاج نہیں
یاس نے کیا بجھا دیا دل کو
کہ تڑپ کیسی اختلاج نہیں
ہم تو سیرت پسند عاشق ہیں
خوب رو کیا جو خوش مزاج نہیں
حور سے پوچھتا ہوں جنت میں
اس جگہ کیا بتوں کا راج نہیں
صبر بھی دل کو داغؔ دے لیں گے
ابھی کچھ اس کی احتیاج نہیں
Is nahin ka koi ilaaj nahin
Is nahin ka koi ilaaj nahin
Roz kahte hain aap aaj nahin
Kal jo tha aaj woh mizaaj nahin
Is talawwun ka kuch ilaaj nahin
Aainah dekhte hi itraaye
Phir yeh kya hai agar mizaaj nahin
Le ke dil rakh lo kaam aayega
Go abhi tum ko ehtiyaaj nahin
Ho saken hum mizaaj daan kyunkar
Hum ko milta tera mizaaj nahin
Chup lagi la'l-e-jaan-faza ko tere
Is maseeha ka kuch ilaaj nahin
Dil be-muddaa Khuda ne diya
Ab kisi shai ki ehtiyaaj nahin
Khotey daamon mein yeh bhi kya thehra
Dirham-e-dagh ka riwaaj nahin
Be-niyazi ki shaan kahti hai
Bandagi ki kuch ehtiyaaj nahin
Dil-lagi kijiye raqeebon se
Is tarah ka mera mizaaj nahin
Ishq hai badshah-e-alam-geer
Garcheh zaahir mein takht-o-taaj nahin
Dard-e-furqat ki go dawa hai visal
Is ke qabil bhi har mizaaj nahin
Yaas ne kya bujha diya dil ko
Ke tadap kaisi ikhtilaj nahin
Hum to seerat pasand ashiq hain
Khub-ru kya jo khush-mizaaj nahin
Hoor se puchhta hun jannat mein
Is jagah kya buton ka raaj nahin
Sabr bhi dil ko Dagh de lenge
Abhi kuch is ki ehtiyaaj nahin
شاعر کے بارے میں
جس کی غزلوں نے اردو زبان کو محبت کی مٹھاس، لہجے کی نزاکت اور بیان کی شوخی بخشی نواب مرزا خان داغ دہلوی۔ 25مئی 1831 کو دہلی میں پیدا ہونے والے داغ...
مکمل تعارف پڑھیں