آبنائے — اقتدار جاوید
شاعر
آبنائے
آنکھ کے آبنائے میں
ڈوبا مچھیرا نہ جانے
فلک تاز دھارے میں
گاتی نہاتی ہوئی سرخ لڑکی کی جاں
اس مچھیرے میں ہے
لڑکی کے گیتوں میں
لنگر انداز کشتی ہے
لہروں کی کروٹ ہے
ساحل کا پھل ہے
مچھیرے کی تازہ جوانی ہے
مستی بھرا نیلا پانی ہے
لڑکی امنڈتی ہوئی وقت کی دھار ہے
جس کے ریلے سے
محشر بپا کرتی لہریں نکلتی ہیں
لڑکی سمندر ہے
گہرے سمندر کی گھمبیر خاموشی
پانی سے اڑتی ہوئی ڈاریں
چکنے کنارے
ہر اک چیز لڑکی کے گیتوں کے اندر ہے
لڑکی پرندہ ہے آبی پرندہ
سمندر کے بے انت سینے پہ
اڑتا ہے صدیوں سے
صدیوں سے لمبی معمر چٹانوں سے جڑتا ہے
مڑتا ہے واپس
سمندر کے بے انت پھیلاؤ کی سمت
لڑکی کوئی معجزہ ہے
سمندر میں جوں ہی اترتی ہے
پانی کو رنگین کرتی ہے
لہروں کی چادر کو اوپر اٹھاتی ہے
نیچے سے موتی کے انبار لاتی ہے
موتی اٹھاتے ہوئے گیت گاتی ہے
لڑکی کے گیتوں کے معنی
فقط اس مچھیرے پہ روشن ہیں
جو آنکھ کے آبنائے میں ڈوبا پڑا ہے
Aabnae
Aankh ke aabnae mein
Dooba machhera na jaane
Falak taaz dhaare mein
Gaati nahaati hui surkh ladki ki jaan
Is machhere mein hai
Ladki ke geeton mein
Langar andaaz kashti hai
Lahron ki karwat hai
Saahil ka phal hai
Machhere ki taza jawani hai
Masti bhara neela paani hai
Ladki umandti hui waqt ki dhaar hai
Jis ke rele se
Mahshar bapa karti lehrein nikalti hain
Ladki samundar hai
Gehre samundar ki gambheer khamoshi
Paani se udti hui daarein
Chikne kinare
Har ek cheez ladki ke geeton ke andar hai
Ladki parinda hai aabi parinda
Samundar ke be-ant seene pe
Udta hai sadiyon se
Sadiyon se lambi ma'moor chatano se judta hai
Murta hai wapas
Samundar ke be-ant phailao ki simt
Ladki koi mojiza hai
Samundar mein joon hi utarti hai
Paani ko rangeen karti hai
Lahron ki chadar ko upar uthaati hai
Neeche se moti ke ambaar laati hai
Moti uthate hue geet gaati hai
Ladki ke geeton ke ma'ani
Faqat us machhere pe roshan hain
Jo aankh ke aabnae mein dooba pada hai
شاعر کے بارے میں
اقتدار جاوید معاصر اردو ادب کے ان ممتاز شعرا میں شمار ہوتے ہیں جنہوں نے اپنی منفرد فکری بصیرت، تہذیبی شعور اور علامتی اسلوب کے ذریعے اردو شاعری میں...
مکمل تعارف پڑھیں