آنسو — جاوید اختر
شاعر
آنسو
کسی کا غم سن کے
میری پلکوں پہ
ایک آنسو جو آ گیا ہے
یہ آنسو کیا ہے
یہ آنسو کیا اک گواہ ہے
میری درد مندی کا میری انسان دوستی کا
یہ آنسو کیا اک ثبوت ہے
میری زندگی میں خلوص کی ایک روشنی کا
یہ آنسو کیا یہ بتا رہا ہے
کہ میرے سینے میں ایک حساس دل ہے
جس نے کسی کی دل دوز داستاں جو سنی
تو سن کے تڑپ اٹھا ہے
پرائے شعلوں میں جل رہا ہے
پگھل رہا ہے
مگر میں پھر خود سے پوچھتا ہوں
یہ داستاں تو ابھی سنی ہے
یہ آنسو بھی کیا ابھی ڈھلا ہے
یہ آنسو
کیا میں یہ سمجھوں
پہلے کہیں نہیں تھا
مجھے تو شک ہے کہ یہ کہیں تھا
یہ میرے دل اور میری پلکوں کے درمیاں
اک جو فاصلہ ہے
جہاں خیالوں کے شہر زندہ ہیں
اور خوابوں کی تربتیں ہیں
جہاں محبت کے اجڑے باغوں میں
تلخیوں کے ببول ہیں
اور کچھ نہیں ہے
جہاں سے آگے ہیں
الجھنوں کے گھنیرے جنگل
یہ آنسو
شاید بہت دنوں سے
وہیں چھپا تھا
جنہوں نے اس کو جنم دیا تھا
وہ رنج تو مصلحت کے ہاتھوں
نہ جانے کب قتل ہو گئے تھے
تو کرتا پھر کس پہ ناز آنسو
کہ ہو گیا بے جواز آنسو
یتیم آنسو یسیر آنسو
نہ معتبر تھا
نہ راستوں سے ہی با خبر تھا
تو چلتے چلتے
وہ تھم گیا تھا
ٹھٹھک گیا تھا
جھجھک گیا تھا
ادھر سے آج اک کسی کے غم کی
کہانی کا کارواں جو گزرا
یتیم آنسو نے جیسے جانا
کہ اس کہانی کی سر پرستی ملے
تو ممکن ہے
راہ پانا
تو اک کہانی کی انگلی تھامے
اسی کے غم کو رومال کرتا
اسی کے بارے میں
جھوٹے سچے سوال کرتا
یہ میری پلکوں تک آ گیا ہے
Aansoo
Kisi ka gham sun ke
Meri palkon pe
Ek aansoo jo aa gaya hai
Yeh aansoo kya hai
Yeh aansoo kya ek gawaah hai
Meri dardmandi ka meri insaan-dosti ka
Yeh aansoo kya ek saboot hai
Meri zindagi mein khuloos ki ek roshni ka
Yeh aansoo kya yeh bata raha hai
Ke mere seene mein ek hassaas dil hai
Jis ne kisi ki dil-doz daastaan jo suni
Toh sun ke tadap utha hai
Paraaye sholon mein jal raha hai
Pighal raha hai
Magar main phir khud se poochhta hoon
Yeh daastaan toh abhi suni hai
Yeh aansoo bhi kya abhi dhala hai
Yeh aansoo
Kya main yeh samjhoon
Pehle kahin nahin tha
Mujhe toh shak hai ke yeh kahin tha
Yeh mere dil aur meri palkon ke darmiyan
Ek jo faasla hai
Jahan khayaalon ke shehr zinda hain
Aur khwabon ki turbatein hain
Jahan mohabbat ke ujde baaghon mein
Talkhiyon ke babool hain
Aur kuch nahin hai
Jahan se aage hain
Uljhanon ke ghanere jungle
Yeh aansoo
Shayad bohat dinon se
Wahin chhupa tha
Jinhon ne us ko janam diya tha
Woh ranj toh maslehat ke haathon
Na jaane kab qatl ho gaye the
Toh karta phir kis pe naaz aansoo
Ke ho gaya be-jawaaz aansoo
Yateem aansoo, yaseer aansoo
Na moatabar tha
Na raaston se hi ba-khabar tha
Toh chalte chalte
Woh tham gaya tha
Thithak gaya tha
Jhijhak gaya tha
Idhar se aaj ek kisi ke gham ki
Kahani ka karwaan jo guzra
Yateem aansoo ne jaise jaana
Ke is kahani ki sarparasti mile
Toh mumkin hai
Raah paana
Toh ek kahani ki ungli thaame
Usi ke gham ko rumaal karta
Usi ke baare mein
Jhoote sacche sawaal karta
Yeh meri palkon tak aa gaya hai
شاعر کے بارے میں
جاوید اختر برصغیر کے اُن ممتاز ادیبوں میں شمار ہوتے ہیں جنہوں نے شاعری، نغمہ نگاری اور فلمی کہانی نویسی کے میدان میں غیر معمولی مقام حاصل کیا۔ وہ 1...
مکمل تعارف پڑھیں