آرزو کے مسافر — جاوید اختر

Aarzoo ke Musafir

Jaane kis ki talaash un ki aankhon mein thi
Aarzoo ke musafir
Bhatakte rahe
Jitna bhi woh chale
Itne hi bichh gaye
Raah mein faasle
Khwab manzil the
Aur manzilen khwab thin
Raaston se nikalte rahe raaste
Jaane kis waaste
Aarzoo ke musafir bhatakte rahe
Jin pe sab chalte hain
Aise sab raaste chhod ke
Ek anjaan pagdandi ki ungli thaame hue
Ik sitare se
Umeed baandhe hue simt ki
Har gumaan ko yaqeen maan ke
Apne dil se
Koi dhoka khate hue jaan ke
Sahra sahra
Samundar ko woh dhoondhte
Kuchh saraabon ki jaanib
Rahe gaamzan
Yun nahin tha
Ke un ko khabar hi na thi
Ye samundar nahin
Lekin un ko kahin
Shayad ehsaas tha
Ye fareb
Un ko mahv-e-safar rakhega
Ye sabab tha
Ke tha aur koi sabab
Jo liye un ko phirta raha
Manzilon manzilon
Raaste raaste
Jaane kis waaste
Aarzoo ke musafir bhatakte rahe
Aksar aisa hua
Shahar dar shahar
Aur basti basti
Kisi bhi dariche mein
Koi chiragh-e-mohabbat na tha
Be-rukhi se bhari
Saari galiyon mein
Saare makanon ke
Darwaze yun band the
Jaise ik sard
Khaamosh lahje mein
Woh kah rahe hon
Murawwat ka aur mehrbani ka maskan
Kahin aur hoga
Yahan to nahin hai
Yehi ek manzar sameete the
Shahron ke patrile sab raaste
Jaane kis waaste
Aarzoo ke musafir bhatakte rahe
Aur kabhi yun hua
Aarzoo ke musafir the
Jalti sulagti hui dhoop mein
Kuchh darakhton ne saaye bichhaye magar
Un ko aisa laga
Saaye mein jo sukoon
Aur aaraam hai
Manzilon tak pahunchne na dega unhein
Aur yun bhi hua
Mahki kaliyon ne khushboo ke paigham bheje unhein
Un ko aisa laga
Chand kaliyon pe kaise qanaat karein
Un ko to dhoondhna hai
Woh gulshan ke jis ko
Kisi ne abhi tak hai dekha nahin
Jaane kyun tha unhein is ka poora yaqeen
Der ho ya sawer un ko lekin kahin
Aise gulshan ke mil jaayenge raaste
Jaane kis waaste
Aarzoo ke musafir bhatakte rahe
Dhoop dhalne lagi
Bas zara der mein raat ho jaayegi
Aarzoo ke musafir jo hain
Un ke qadmon tale
Jo bhi ik raah hai
Woh bhi shayad andhere mein kho jaayegi
Aarzoo ke musafir bhi
Apne thake haare bejaan pairon pe
Kuchh der tak larkharayenge
Aur gir ke so jaayenge
Sirf sannata sochega ye raat bhar
Manzilen to unhein jaane kitni milin
Ye magar
Manzilon ko samajhte rahe jaane kyun raaste
Jaane kis waaste
Aarzoo ke musafir bhatakte rahe
Aur phir ik savere ki ujli kiran
Teergi cheer ke
Jagmaga degi
Jab an gint rahguzaron pe bikhre hue
Un ke naqsh-e-qadam
Aafiyat gaahon mein rahne wale
Ye hairat se majboor ho ke kahenge
Ye naqsh-e-qadam sirf naqsh-e-qadam hi nahin
Ye to daryaaft hain
Ye to ijaad hain
Ye to afkaar hain
Ye to ash'aar hain
Ye koi raqs hain
Ye koi raag hain
In se hi to hain aaraasta
Saari tehzeeb-o-tareekh ke
Waqt ke
Zindagi ke sabhi raaste
Woh musafir magar
Jaante boojhte bhi rahe bekhabar
Jis ko chhoo len qadam
Woh to bas raah thi
Un ki manzil digar thi
Alag chah thi
Jo nahin mil sake us ki thi aarzoo
Jo nahin hai kahin us ki thi justaju
Shayad is waaste
Aarzoo ke musafir bhatakte rahe