کائنات — جاوید اختر
شاعر
کائنات
میں کتنی صدیوں سے تک رہا ہوں
یہ کائنات اور اس کی وسعت
تمام حیرت تمام حیرت
یہ کیا تماشا یہ کیا سماں ہے
یہ کیا عیاں ہے یہ کیا نہاں ہے
اتھاہ ساغر ہے اک خلا کا
نہ جانے کب سے نہ جانے کب تک
کہاں تلک ہے
ہماری نظروں کی انتہا ہے
جسے سمجھتے ہیں ہم فلک ہے
یہ رات کا چھلنی چھلنی سا کالا آسماں ہے
کہ جس میں جگنو کی شکل میں
بے شمار سورج پگھل رہے ہیں
شہاب ثاقب ہے
یا ہمیشہ کی ٹھنڈی کالی فضاؤں میں
جیسے آگ کے تیر چل رہے ہیں
کروڑ ہا نوری برسوں کے فاصلوں میں پھیلی
یہ کہکشائیں
خلا گھیرے ہیں
یا خلاؤں کی قید میں ہے
یہ کون کس کو لیے چلا ہے
ہر ایک لمحہ
کروڑوں میلوں کی جو مسافت ہے
ان کو آخر کہاں ہے جانا
اگر ہے ان کا کہیں کوئی آخری ٹھکانا
تو وہ کہاں ہے
جہاں کہیں ہے
سوال یہ ہے
وہاں سے آگے کوئی زمیں ہے
کوئی فلک ہے
اگر نہیں ہے
تو یہ نہیں کتنی دور تک ہے
میں کتنی صدیوں سے تک رہا ہوں
یہ کائنات اور اس کی وسعت
تمام حیرت تمام حیرت
ستارے جن کی سفیر کرنیں
کروڑوں برسوں سے راہ میں ہے
زمیں سے ملنے کی چاہ میں ہے
کبھی تو آ کے کریں گی یہ میری آنکھیں روشن
کبھی تو آئے گی میرے ہاتھوں میں روشنی کا ایک ایسا دامن
کہ جس کو تھامے میں جا کے دیکھوں گا ان خلاؤں کے
پھیلے آنگن
کبھی تو مجھ کو یہ کائنات اپنے راز کھل کے
سنا ہی دے گی
یہ اپنا آغاز اپنا انجام
مجھ کو اک دن بتا ہی دے گی
اگر کوئی واعظ اپنے منبر سے
نخوت آمیز لحظے میں یہ کہے
کہ تم تو کبھی سمجھ ہی نہیں سکو گے
کہ اس قدر ہے یہ بات گہری
تو کوئی پوچھے
جو میں نہ سمجھا
تو کون سمجھائے گا
اور جس کو کبھی نہ کوئی سمجھ سکے
ایسی بات تو پھر فضول ٹھہری
Kaa'inaat
Maiñ kitni sadiyoñ se tak raha hooñ
Yeh kaa'inaat aur us ki wus'at
Tamaam hairat, tamaam hairat
Yeh kya tamaasha yeh kya samaa'n hai
Yeh kya 'ayaañ hai yeh kya nihaa'n hai
Athaah saagar hai ik khala ka
Na jaane kab se na jaane kab tak
Kahaañ talak hai
Hamaari nazaroñ ki intiha hai
Jise samajhte hain hum falak hai
Yeh raat ka chhalni chhalni sa kaala aasmaan hai
Ke jis meiñ jugnu ki shakal meiñ
Be-shumaar sooraj pighal rahe hain
Shahaab-e-saaqib hai
Ya hamesha ki thandi kaali fizaa'oñ meiñ
Jaise aag ke teer chal rahe hain
Karoṛ ha noori barsoñ ke faasloñ meiñ phaili
Yeh kahkashaayeñ
Khala ghere hain
Ya khalaa'oñ ki qaid meiñ hai
Yeh kaun kis ko liye chala hai
Har ek lamha
Karoṛoñ meeloñ ki jo musaafat hai
Un ko aakhir kahaañ hai jaana
Agar hai un ka kaheen koi aakhri thikaana
To woh kahaañ hai
Jahaañ kaheen hai
Sawaal yeh hai
Wahaañ se aage koi zameen hai
Koi falak hai
Agar naheen hai
To yeh naheen kitni door tak hai
Maiñ kitni sadiyoñ se tak raha hooñ
Yeh kaa'inaat aur us ki wus'at
Tamaam hairat, tamaam hairat
Sitaare jin ki safeer kirneiñ
Karoṛoñ barsoñ se raah meiñ hai
Zameen se milne ki chaah meiñ hai
Kabhi to aa ke kareiñ gi yeh meri aankheiñ roshan
Kabhi to aa'egi mere haathoñ meiñ roshni ka ek aisa daaman
Ke jis ko thaame maiñ jaa ke dekhooñ ga un khalaa'oñ ke
Phaile aangan
Kabhi to mujh ko yeh kaa'inaat apne raaz khul ke
Suna hi de gi
Yeh apna aaghaaz apna anjaam
Mujh ko ek din bata hi de gi
Agar koi waa'iz apne mimbar se
Nakhowat aamez lehze meiñ yeh kahe
Ke tum to kabhi samajh hi naheen sako ge
Ke is qadar hai yeh baat gahri
To koi poochhe
Jo maiñ na samjha
To kaun samjhaaye ga
Aur jis ko kabhi na koi samajh sake
Aisi baat to phir fazool thahri
شاعر کے بارے میں
جاوید اختر برصغیر کے اُن ممتاز ادیبوں میں شمار ہوتے ہیں جنہوں نے شاعری، نغمہ نگاری اور فلمی کہانی نویسی کے میدان میں غیر معمولی مقام حاصل کیا۔ وہ 1...
مکمل تعارف پڑھیں