کچی بستی — جاوید اختر
شاعر
کچی بستی
گلیاں
اور گلیوں میں گلیاں
چھوٹے گھر
نیچے دروازے
ٹاٹ کے پردے
میلی بد رنگی دیواریں
دیواروں سے سر ٹکراتی
کوئی گالی
گلیوں کے سینے پر بہتی
گندی نالی
گلیوں کے ماتھے پر بہتا
آوازوں کا گندہ نالا
آوازوں کی بھیڑ بہت ہے
انسانوں کی بھیڑ بہت ہے
کڑوے اور کسیلے چہرے
بد حالی کے زہر سے ہیں زہریلے چہرے
بیماری سے پیلے چہرے
مرتے چہرے
ہارے چہرے
بے بس اور بے چارے چہرے
سارے چہرے
ایک پہاڑی کچرے کی
اور اس پر پھرتے
آوارہ کتوں سے بچے
اپنا بچپن ڈھونڈ رہے ہیں
دن ڈھلتا ہے
اس بستی میں رہنے والے
اوروں کی جنت کو اپنی محنت دے کر
اپنے جہنم کی جانب
اب تھکے ہوئے
جھنجھلائے ہوئے سے
لوٹ رہے ہیں
ایک گلی میں
زنگ لگے پیپے رکھے ہیں
کچی دارو مہک رہی ہے
آج سویرے سے
بستی میں
قتل و خوں کا
چاقو زنی کا
کوئی قصہ نہیں ہوا ہے
خیر
ابھی تو شام ہے
پوری رات پڑی ہے
یوں لگتا ہے
ساری بستی
جیسے اک دکھتا پھوڑا ہے
یوں لگتا ہے
ساری بستی
جیسے ہے اک جلتا کڑھاؤ
یوں لگتا ہے
جیسے خدا نکڑ پر بیٹھا
ٹوٹے پھوٹے انساں
اونے پونے داموں
بیچ رہا ہے!
Kachchi Basti
Galiyaañ
Aur galiyoñ meiñ galiyaañ
Chhoṭe ghar
Neeche darwaaze
Ṭaaṭ ke parde
Maili bad-rangi deewareiñ
Deewaroñ se sar ṭukraati
Koi gaali
Galiyoñ ke seene par bahti
Gandi naali
Galiyoñ ke maathe par bahta
Aawaazoñ ka ganda naala
Aawaazoñ ki bheeṛ bahut hai
Insaanoñ ki bheeṛ bahut hai
Kaṛwe aur kaseele chehre
Bad-haali ke zehar se hain zehrele chehre
Beemaari se peele chehre
Marte chehre
Haare chehre
Be-bas aur be-chaare chehre
Saare chehre
Ek pahaaṛi kachre ki
Aur us par phirte
Aawaara kuttoñ se bachche
Apna bachpan ḍhooñḍ rahe hain
Din ḍhalta hai
Is basti meiñ rahne waale
Auroñ ki jannat ko apni mehnat de kar
Apne jahannum ki jaanib
Ab thhake hue
Jhunjhlaa'e hue se
Lauṭ rahe hain
Ek gali meiñ
Zang lage peepe rakhe hain
Kachchi daaru mehak rahi hai
Aaj savere se
Basti meiñ
Qatl o khooñ ka
Chaaqu zani ka
Koi qissa naheen hua hai
Khair
Abhi to shaam hai
Poori raat paṛi hai
Yooñ lagta hai
Saari basti
Jaise ik dukhta phoṛa hai
Yooñ lagta hai
Saari basti
Jaise hai ik jalta kaṛhaa'o
Yooñ lagta hai
Jaise Khuda nukaṛ par baiṭha
Ṭooṭe phooṭe insaañ
Oune paune daamoñ
Bech raha hai!
شاعر کے بارے میں
جاوید اختر برصغیر کے اُن ممتاز ادیبوں میں شمار ہوتے ہیں جنہوں نے شاعری، نغمہ نگاری اور فلمی کہانی نویسی کے میدان میں غیر معمولی مقام حاصل کیا۔ وہ 1...
مکمل تعارف پڑھیں