وہ کمرہ یاد آتا ہے — جاوید اختر

Woh Kamra Yaad Aata Hai

Main jab bhi
Zindagi ki chalchilati dhoop mein tap kar
Main jab bhi
Doosron ke aur apne jhoot se thak kar
Main sab se lad ke khud se haar ke
Jab bhi us ek kamre mein jaata tha
Woh halke aur gehre kathai rangon ka ek kamra
Woh be-had mehrban kamra
Jo apni narm mutthi mein mujhe aise chhupa leta tha
Jaise koi maa
Bachche ko aanchal mein chhupa le
Pyaar se daante
Yeh kya aadat hai
Jalti dopahar mein maare maare ghoomte ho tum
Woh kamra yaad aata hai
Dabeez aur khaasa bhaari
Kuch zara mushkil se khulne wala woh sheesham ka darwaza
Ke jaise koi akkhad baap
Apne khurdure seene mein
Shafqat ke samandar ko chhupaye ho
Woh kursi
Aur us ke saath woh judwaan behan us ki
Woh dono
Dost theen meri
Woh ek gustaakh munh phat aaina
Jo dil ka achha tha
Woh be-hangam si almaari
Jo kone mein khadi
Ek boodhi ana ki tarah
Aaine ko tanbeeh karti thi
Woh ek guldaan
Nanha sa
Bohat shaitaan
In dono pe hansta tha
Dareecha
Ya zehanat se bhari ek muskurahat
Aur dareeche par jhuki woh bel
Koi sabz sargoshi
Kitabein
Taaq mein aur shelf par
Sanjeeda ustaani bani baithi hain
Magar sab muntazir is baat ki
Main un se kuch poochhoon
Sirhaane
Neend ka saathi
Thakan ka chaaraagar
Woh narm dil takiya
Main jis ki god mein sar rakh ke
Chhat ko dekhta tha
Chhat ki kadiyon mein
Na jaane kitne afsaanon ki kadiyan theen
Woh chhoti mez par
Aur saamne deewar par
Aawizaan tasveerein
Mujhe apnaayat se aur yaqeen se dekhti theen
Muskurati theen
Unhein shak bhi nahin tha
Ek din
Main un ko aise chhod jaunga
Main ek din yoon bhi jaunga
Ke phir waapas na aunga
Main ab jis ghar mein rahta hoon
Bohat hi khoobsurat hai
Magar aksar yahan khamosh baitha yaad karta hoon
Woh kamra baat karta tha