جس دم یہ سنا ہے صبح وطن محبوس فضائے زنداں میں — مجروح سلطانپوری
شاعر
جس دم یہ سنا ہے صبح وطن محبوس فضائے زنداں میں
جس دم یہ سنا ہے صبح وطن محبوس فضائے زنداں میں
جیسے کہ صبا اے ہم قفسو بیتاب ہم آئے زنداں میں
ہو تیغ اثر زنجیر قدم پھر بھی ہیں نقیب منزل ہم
زخموں سے چراغ راہ گزر بیٹھے ہیں جلائے زنداں میں
صدچاک قبائے امن و سکوں عریاں ہے اہنسائی کا جنوں
کچھ خوں سے شہیدوں نے اپنے وہ گل ہیں کھلائے زنداں میں
یہ جبر سیاست یہ انساں مظلوم آہیں مجبور فغاں
زخموں کی مہک داغوں کا دھواں مت پوچھ فضائے زنداں میں
غیروں کی خلش اپنوں کی لگن سوز غم جاناں درد وطن
کیا کہیے کہ ہم ہیں کس کس کو سینے سے لگائے زنداں میں
گل بنتی ہے شاید خاک وطن شاید کہ سفر کرتی ہے خزاں
خوشبوئے بہاراں ملتی ہے کچھ دن سے ہوائے زنداں میں
مجرم تھے جو ہم سو قید ہوئے صیاد مگر اب یہ تو بتا
ہر وقت یہ کس کو ڈھونڈتے ہیں دیوار کے سائے زنداں میں
جسموں پہ یہ کس کا نام سیہ لکھ دیتے ہیں کوڑوں کے نشاں
ہیں تاک میں کس کی زنجیریں اب آنکھ لگائے زنداں میں
رفتار زمانہ لے جن کی گاتی ہے گل نغمہ جن کا
ہم گاتے ہیں ان آوازوں سے آواز ملائے زنداں میں
Jis dam yeh suna hai subh-e-watan mahboos faza-e-zindan mein
Jis dam yeh suna hai subh-e-watan mahboos faza-e-zindan mein
Jaise ke saba aye hum qafaso betaab hum aaye zindan mein
Ho tegh-e-asar zanjeer-e-qadam phir bhi hain naqeeb-e-manzil hum
Zakhmoun se chiragh-e-raahguzar baithe hain jalaye zindan mein
Sad chaak qaba-e-amn-o-sukoon uryaan hai ahinsaai ka junoon
Kuch khoon se shaheedon ne apne woh gul hain khilaye zindan mein
Yeh jabr-e-siyasat yeh insaan mazloom aahein majboor-e-fughaan
Zakhmoun ki mahak daaghoun ka dhuan mat pooch faza-e-zindan mein
Ghairon ki khalish apnon ki lagan soz-e-gham-e-jaanan dard-e-watan
Kya kahiye ke hum hain kis kis ko seene se lagaye zindan mein
Gul banti hai shayad khaak-e-watan shayad ke safar karti hai khizaan
Khushboo-e-baharan milti hai kuch din se hawa-e-zindan mein
Mujrim the jo hum so qaid hue sayyad magar ab yeh to bata
Har waqt yeh kis ko dhoondte hain deewar ke saaye zindan mein
Jismon pe yeh kis ka naam siyah likh dete hain kodon ke nishan
Hain taak mein kis ki zanjeerein ab aankh lagaye zindan mein
Raftaar-e-zamana le jin ki gaati hai gul naghma jin ka
Hum gaate hain un awaazon se awaaz milaye zindan mein
شاعر کے بارے میں
مجروح سلطان پوری بیسویں صدی کے اُن ممتاز اردو شعرا میں شمار ہوتے ہیں جنہوں نے کلاسیکی شعری روایت اور جدید حسیت کو نہایت سلیقے سے ہم آہنگ کیا۔ ان کا...
مکمل تعارف پڑھیں