جزو اور کل — میراجی
شاعر
جزو اور کل
سمجھ لو کہ جو شے نظر آئے اور یہ کہے میں کہاں ہوں
کہیں بھی نہیں ہے
سمجھ لو کہ جو شے دکھائی دیا کرتی ہے اور دکھائی نہیں دیتی ہے
وہ یہیں ہے
یہیں ہے مگر اب کہاں ہے
مگر اب کہاں ہے
یہ کیا بات ہے ایسے جیسے ابھی وہ یہیں تھی
مگر اب کہاں ہے
کوئی یاد ہے یا کوئی دھیان ہے یا کوئی خواب ہے
نہ وہ یاد ہے اور نہ وہ دھیان ہے اور نہ وہ خواب ہے
مگر پھر بھی کچھ ہے
مگر پھر بھی کچھ ہے
وہ اک لہر ہے ہاں فقط لہر ہے
وہ اک لہر ہے ایسی جیسی کسی لہر میں بھی کوئی بات ہی تو نہیں ہے
اسی بات کو رو رہا ہوں
اسی بات کو رو رہا ہے زمانہ
زمانہ اگر رو رہا ہے تو روئے
مگر میں ازل سے تبسم ہنسی قہقہوں ہی میں پلتا رہا ہوں
ازل سے مرا کام ہنسنا ہنسانا رہا ہے
تو کیا جب زمانہ ہنسا تھا تو اس کو ہنسایا تھا میں نے
یہ تم کہہ رہے ہو جو روتے رہے ہو
اگر تم یہ کہتے ہو میں مانتا ہوں
مگر جب زمانے کو رونا رلانا ملانا ہے تو روتا رہے گا زمانہ
فقط میں ہنسوں گا
یہ ممکن نہیں ہے
زمانہ اگر روئے روؤں گا میں بھی
زمانہ ہنسے گا تو میں بھی ہنسوں گا
مگر یہ زمانے کا ہنسنا یہ رونا وہ شے ہے نظر آئے اور
یہ کہے میں کہاں ہوں کہیں بھی نہیں ہوں
زمانے کا ہنسنا زمانے کا رونا وہ شے ہے
دکھائی دیا کرتی ہے اور دکھائی نہیں دیتی ہے اور یہیں ہے
میں ہنستا چلا جاؤں گا اور روتا چلا جاؤں گا اور پھر بھی
زمانہ کہے گا تو روتا رہا ہے تو ہنستا رہا ہے
مگر میں یہ کہتا ہوں تم سے کہ میں ہی وہ شے ہوں
جو اب بھی نظر آئے اور یہ کہے میں کہاں ہوں تو پھر بھی دکھائی
نہ دے اور کہے میں کہیں بھی نہیں ہوں
میں روتا رہا تھا میں ہنستا گیا ہوں
مگر تم تو ہنستے گئے تھے
بس اب تم ہی روؤ گے اور صرف
اک میں ہوں جو اب بھی ہنستا رہوں گا
Juzv Aur Kul
Samajh lo ke jo shai nazar aaye aur yeh kahe main kahan hoon
Kahin bhi nahin hai
Samajh lo ke jo shai dikhayi diya karti hai aur dikhayi nahin deti hai
Woh yahin hai
Yahin hai magar ab kahan hai
Magar ab kahan hai
Yeh kya baat hai aise jaise abhi woh yahin thi
Magar ab kahan hai
Koi yaad hai ya koi dhyaan hai ya koi khwab hai
Na woh yaad hai aur na woh dhyaan hai aur na woh khwab hai
Magar phir bhi kuch hai
Magar phir bhi kuch hai
Woh ek lehar hai haan faqat lehar hai
Woh ek lehar hai aisi jaisi kisi lehar mein bhi koi baat hi toh nahin hai
Isi baat ko ro raha hoon
Isi baat ko ro raha hai zamana
Zamana agar ro raha hai toh roye
Magar main azal se tabassum hansi qahqahon hi mein palta raha hoon
Azal se mera kaam hansna hansana raha hai
Toh kya jab zamana hansa tha toh us ko hansaya tha main ne
Yeh tum keh rahe ho jo rote rahe ho
Agar tum yeh kehte ho main maanta hoon
Magar jab zamane ko rona rulana milana hai toh rota rahega zamana
Faqat main hansunga
Yeh mumkin nahin hai
Zamana agar roye ro'unga main bhi
Zamana hansega toh main bhi hansunga
Magar yeh zamane ka hansna yeh rona woh shai hai nazar aaye aur
Yeh kahe main kahan hoon kahin bhi nahin hoon
Zamane ka hansna zamane ka rona woh shai hai
Dikhayi diya karti hai aur dikhayi nahin deti hai aur yahin hai
Main hansta chala jaunga aur rota chala jaunga aur phir bhi
Zamana kahega tu rota raha hai tu hansta raha hai
Magar main yeh kehta hoon tum se ke main hi woh shai hoon
Jo ab bhi nazar aaye aur yeh kahe main kahan hoon toh phir bhi dikhayi
Na de aur kahe main kahin bhi nahin hoon
Main rota raha tha main hansta gaya hoon
Magar tum toh hanste gaye the
Bas ab tum hi ro'oge aur sirf
Ik main hoon jo ab bhi hansta rahunga
شاعر کے بارے میں
میرا جی اردو ادب کے اُن چند منفرد اور اثر انگیز شعرا میں شمار ہوتے ہیں جنہوں نے بیسویں صدی میں اردو نظم کو ایک بالکل نیا شعور، نیا لہجہ اور نئی فکر...
مکمل تعارف پڑھیں