لب جوئے بارے — میراجی
شاعر
لب جوئے بارے
ایک ہی پل کے لیے بیٹھ کے پھر اٹھ بیٹھی
آنکھ نے صرف یہ دیکھا کہ نشستہ بت ہے
یہ بصارت کو نہ تھی تاب کہ وہ دیکھ سکے
کیسے تلوار چلی، کیسے زمیں کا سینہ
ایک لمحے کے لیے چشمے کی مانند بنا
پیچ کھاتے ہوئے یہ لہر اٹھی دل میں مرے
کاش! یہ جھاڑیاں اک سلسلۂ کوہ بنیں
دامن کوہ میں میں جا کے ستادہ ہو جاؤں
ایسی انہونی جو ہو جائے تو کیوں یہ بھی نہ ہو
خشک پتوں کا زمیں پر جو بچھا ہے بستر
وہ بھی اک ساز بنے ساز تو ہے ساز تو ہے
نغمہ بیدار ہوا تھا جو ابھی کان ترے
کیوں اسے سن نہ سکے سننے سے مجبور رہے
پردۂ چشم نے صرف ایک نشستہ بت کو
ذہن کے دائرۂ خاص میں مرکوز کیا
یاد آتا ہے مجھے کان ہوئے تھے بیدار
خشک پتوں سے جب آئی تھی تڑپنے کی صدا
اور دامن کی ہر اک لہر چمک اٹھی تھی
پڑ رہا تھا اسی تلوار کا سایہ شاید
جو نکل آئی تھی اک پل میں نہاں خانے سے
جیسے بے ساختہ انداز میں بجلی چمکے
لیکن اس دامن آلودہ کی ہر لہر مٹی
جل پری دیکھتے ہی دیکھتے روپوش ہوئی
میں ستادہ ہی رہا میں نے نہ دیکھا (افسوس!)
کیسے تلوار چلی کیسے زمیں کا سینہ
ایک لمحے کے لیے چشمے کی مانند بنا
دامن کوہ میں استادہ نہیں ہوں اس وقت
جھاڑیاں سلسلۂ کوہ نہیں پردہ ہیں
جس کے اس پار جھلکتا نظر آتا ہے مجھے
منظر انجان، اچھوتی سی دلہن کی صورت
ہاں تصور کو میں اب اپنے بنا کر دولہا
اسی پردے کے نہاں خانے میں لے جاؤں گا
کیسے تلوار چلی کیسے زمیں کا سینہ
دل بے تاب کی مانند تڑپ اٹھا تھا
ایک بے ساختہ انداز میں بجلی کی طرح
جل پری گوشۂ خلوت سے نکل آئی تھی!
زندگی گرم تھی ہر بوند میں آبی پاؤں
خشک پتوں پہ پھسلتے ہوئے جا پہنچے تھے!
میں بھی موجود تھا اک کرمک بے نام و نشاں
میں نے دیکھا کہ گھٹا شق ہوئی دھارا نکلی
برق رفتاری سے اک تیر کماں نے چھوڑا
اور وہ خم کھا کے لچکتا ہوا تھرا کے گرا
قلۂ کوہ سے گرتے ہوئے پتھر کی طرح
کوئی بھی روک نہ تھی اس کے لیے اس کے لیے
خشک پتوں کا زمیں پر ہی بچھا تھا بستر
اسی بستر پہ وہ انجان پری لیٹ گئی!
اور میں کرمک بے نام، گھٹا کی صورت
اسی امید میں تکتا رہا تکتا ہی رہا
اب اسی وقت کوئی جل کی پری آ جائے
بانسری ہاتھ میں لے کر میں گوالا بن جاؤں
جل پری آئے کہاں سے؟ وہ اسی بستر پر
میں نے دیکھا ابھی آسودہ ہوئی لیٹ گئی
لیکن افسوس کہ میں اب بھی کھڑا ہوں تنہا
ہاتھ آلودہ ہے، نم دار ہے، دھندلی ہے نظر،
ہاتھ سے آنکھوں کے آنسو تو نہیں پونچھے تھے!
Lab-e-Jū-e-Bāre
Ek hī pal ke liye baiṭh ke phir uṭh baiṭhī
Āñkh ne sirf ye dekhā ke nashist-e-but hai
Ye basārat ko na thī tāb ke vo dekh sake
Kaise talvār chalī, kaise zamīn kā sīna
Ek lamhe ke liye chashme kī mānind banā
Pech khāte hue ye lahar uṭhī dil mein mere
Kāsh! Ye jhāṛiyān ik silsila-e-koh banein
Dāman-e-koh mein main jā ke istāda ho jāūn
Aisī anhonī jo ho jāye to kyūn ye bhī na ho
Khushk patton kā zamīn par jo bichhā hai bistar
Vo bhī ik sāz bane sāz to hai sāz to hai
Naghma bedār huā thā jo abhī kān tere
Kyūn اسے sun na sake sunne se majbūr rahe
Parda-e-chashm ne sirf ek nashist-e-but ko
Zehan ke dāʾira-e-khās mein markūz kiyā
Yād ātā hai mujhe kān hue the bedār
Khushk patton se jab āī thī taṛapne kī sadā
Aur dāman kī har ik lahar chamak uṭhī thī
Paṛ rahā thā isī talvār kā sāyā shāyad
Jo nikal āī thī ik pal mein nihān khāne se
Jaise be-sākhta andāz mein bijlī chamke
Lekin us dāman-e-ālūda kī har lahar miṭī
Jal parī dekhte hī dekhte rūposh huī
Main istāda hī rahā main ne na dekhā (afsos!)
Kaise talvār chalī kaise zamīn kā sīna
Ek lamhe ke liye chashme kī mānind banā
Dāman-e-koh mein istāda naheen hūn is vaqt
Jhāṛiyān silsila-e-koh nahīn parda hain
Jis ke us pār jhalaktā nazar ātā hai mujhe
Manzar-e-anjān, achhūtī sī dulhan kī sūrat
Hān tasavvur ko main ab apne banā kar dulhā
Isī parde ke nihān khāne mein le jāūn gā
Kaise talvār chalī kaise zamīn kā sīna
Dil-e-be-tāb kī mānind taṛap uṭhā thā
Ek be-sākhta andāz mein bijlī kī tarah
Jal parī goshaa-e-khalvat se nikal āī thī!
Zindagi garm thī har būnd mein ābī pāon
Khushk patton pe phisalte hue jā pahuñche the!
Main bhī maujūd thā ik karmak-e-be-nām-o-nishān
Main ne dekhā ke ghaṭā shaq huī dhārā niklī
Barq raftārī se ik tīr kamān ne choṛā
Aur vo kham khā ke lachaktā huā tharā ke girā
Qila-e-koh se girte hue patthar kī tarah
Koī bhī rok na thī us ke liye us ke liye
Khushk patton kā zamīn par hī bichhā thā bistar
Isī bistar pe vo anjān parī leṭ gaī!
Aur main karmak-e-be-nām, ghaṭā kī sūrat
Isī ummīd mein taktā rahā taktā hī rahā
Ab isī vaqt koī jal kī parī ā jāye
Bānsurī hāth mein le kar main gwālā ban jāūn
Jal parī āye kahān se? Vo isī bistar par
Main ne dekhā abhī āsūda huī leṭ gaī
Lekin afsos ke main ab bhī khaṛā hūn tanhā
Hāth ālūda hai, namdār hai, dhundlī hai nazar,
Hāth se āñkhon ke āñsū to nahīn pūnche the!
شاعر کے بارے میں
میرا جی اردو ادب کے اُن چند منفرد اور اثر انگیز شعرا میں شمار ہوتے ہیں جنہوں نے بیسویں صدی میں اردو نظم کو ایک بالکل نیا شعور، نیا لہجہ اور نئی فکر...
مکمل تعارف پڑھیں