یعنی — میراجی
شاعر
یعنی
میں سوچتا ہوں اک نظم لکھوں
لیکن اس میں کیا بات کہوں
اک بات میں بھی سو باتیں ہیں
کہیں جیتیں ہیں کہیں ماتیں ہیں
دل کہتا ہے میں سنتا ہوں
من مانے پھول یوں چنتا ہوں
جب مات ہو مجھ کو چپ نہ رہوں
اور جیت جو ہو درانہ کہوں
پل کے پل میں اک نظم لکھوں
لیکن اس میں کیا بات کہوں
جب یوں الجھن بڑھ جاتی ہے
تب دھیان کی دیوی آتی ہے
اکثر تو وہ چپ ہی رہتی ہے
کہتی ہے تو اتنا کہتی ہے
کیوں سوچتے ہو اک نظم لکھو
کیوں اپنے دل کی بات کہو
بہتر تو یہی ہے چپ ہی رہو
لیکن پھر سوچ یہ آتی ہے
جب ندی بہتی جاتی ہے
اور اپنی اننت کہانی میں
یوں بے دھیانی میں روانی میں
مانا ہر موڑ پہ مڑتی ہے
پر جی کی کہہ کے گزرتی ہے
سر پر آئی سہہ جاتی ہے
اور منہ آئی کہہ جاتی ہے
دھرتی کے سینے پہ چڑھتی ہے
اور آگے ہی آگے بڑھتی ہے
یوں میں بھی دل کی بات کہوں
جی میں آئے تو نظم لکھوں
چاہے اک بات میں سو باتیں
جیتیں لے آئیں یا ماتیں
چاہے کوئی بات بنے نہ بنے
چاہے سکھ ہوں یا دکھ اپنے
چاہے کوئی مجھ سے آ کے کہے
کیوں بول اٹھے کیوں چپ نہ رہے
چاہے میں کہہ کر چپ ہی رہوں
میں سوچتا ہوں اک نظم لکھوں
لیکن اس میں کیا بات کہوں
Yaani
Main sochta hoon ek nazm likhoon
Lekin is mein kya baat kahoon
Ek baat mein bhi sau baatein hain
Kahin jeetein hain kahin maatein hain
Dil kehta hai main sunta hoon
Man maane phool yun chunta hoon
Jab maat ho mujh ko chup na rahoon
Aur jeet jo ho duraana kahoon
Pal ke pal mein ek nazm likhoon
Lekin is mein kya baat kahoon
Jab yun uljhan badh jaati hai
Tab dhyaan ki devi aati hai
Aksar to woh chup hi rehti hai
Kehti hai to itna kehti hai
Kyun sochte ho ek nazm likho
Kyun apne dil ki baat kaho
Behtar to yehi hai chup hi raho
Lekin phir soch yeh aati hai
Jab nadi behti jaati hai
Aur apni anant kahani mein
Yun be-dhyaani mein rawani mein
Maana har mod pe mudti hai
Par jee ki keh ke guzarti hai
Sar par aayi seh jaati hai
Aur munh aayi keh jaati hai
Dharti ke seene pe chadhti hai
Aur aage hi aage badhti hai
Yun main bhi dil ki baat kahoon
Jee mein aaye to nazm likhoon
Chahe ek baat mein sau baatein
Jeetein le aaein ya maatein
Chahe koi baat bane na bane
Chahe sukh hoon ya dukh apne
Chahe koi mujh se aa ke kahe
Kyun bol uthe kyun chup na rahe
Chahe main keh kar chup hi rahoon
Main sochta hoon ek nazm likhoon
Lekin is mein kya baat kahoon
شاعر کے بارے میں
میرا جی اردو ادب کے اُن چند منفرد اور اثر انگیز شعرا میں شمار ہوتے ہیں جنہوں نے بیسویں صدی میں اردو نظم کو ایک بالکل نیا شعور، نیا لہجہ اور نئی فکر...
مکمل تعارف پڑھیں