باغ پا کر خفقانی یہ ڈراتا ہے مجھے — مرزا غالب
شاعر
باغ پا کر خفقانی یہ ڈراتا ہے مجھے
باغ پا کر خفقانی یہ ڈراتا ہے مجھے
سایۂ شاخ گل افعی نظر آتا ہے مجھے
جوہر تیغ بہ سر چشمۂ دیگر معلوم
ہوں میں وہ سبزہ کہ زہراب اگاتا ہے مجھے
مدعا محو تماشائے شکست دل ہے
آئنہ خانہ میں کوئی لیے جاتا ہے مجھے
نالہ سرمایۂ یک عالم و عالم کف خاک
آسماں بیضۂ قمری نظر آتا ہے مجھے
زندگی میں تو وہ محفل سے اٹھا دیتے تھے
دیکھوں اب مر گئے پر کون اٹھاتا ہے مجھے
باغ تجھ بن گل نرگس سے ڈراتا ہے مجھے
چاہوں گر سیر چمن آنکھ دکھاتا ہے مجھے
شور تمثال ہے کس رشک چمن کا یا رب
آئنہ بیضۂ بلبل نظر آتا ہے مجھے
حیرت آئنہ انجام جنوں ہوں جیوں شمع
کس قدر داغ جگر شعلہ اٹھاتا ہے مجھے
میں ہوں اور حیرت جاوید مگر ذوق خیال
بہ فسون نگۂ ناز ستاتا ہے مجھے
حیرت فکر سخن ساز سلامت ہے اسدؔ
دل پس زانوئے آئینہ بٹھاتا ہے مجھے
Bagh pa kar khafqani yeh darata hai mujhe
Bagh pa kar khafqani yeh darata hai mujhe
Saya-e-shakh-e-gul af'i nazar aata hai mujhe
Jauhar-e-tegh ba sar-chashma-e-digar ma'loom
Hoon main woh sabza ke zehrab ugaata hai mujhe
Muddaa mahv-e-tamasha-e-shikast-e-dil hai
Aaina-khana mein koi liye jaata hai mujhe
Nala sarmaya-e-yak alam o alam kaff-e-khak
Aasmaan baiza-e-qumri nazar aata hai mujhe
Zindagi mein to woh mahfil se utha dete the
Dekhoon ab mar gaye par kaun uthata hai mujhe
Bagh tujh bin gul-e-nargis se darata hai mujhe
Chahoon gar sair-e-chaman aankh dikhata hai mujhe
Shour-e-timsaal hai kis rashk-e-chaman ka Ya Rab
Aaina baiza-e-bulbul nazar aata hai mujhe
Hairat-e-aaina-anjaam-e-junoon hoon jiyoon sham'a
Kis qadar daagh-e-jigar sho'la uthata hai mujhe
Main hoon aur hairat-e-javeed magar zauq-e-khayal
Ba fasoon-e-nigah-e-naaz satata hai mujhe
Hairat-e-fikr-e-sukhan-saaz salamat hai Asad
Dil pas-e-zaanu-e-aaina bithata hai mujhe
شاعر کے بارے میں
غالب کا اصل نام اسد اللہ بیگ تھا، وہ 27 دسمبر 1797ء کو آگرہ میں پیدا ہوئے۔ غالب اردو کے ایک منفرد شاعر تھے ان کے بارے میں مشہور تھا کہ وہ زندگی کے...
مکمل تعارف پڑھیں