بزم شاہنشاہ میں اشعار کا دفتر کھلا — مرزا غالب
شاعر
بزم شاہنشاہ میں اشعار کا دفتر کھلا
بزم شاہنشاہ میں اشعار کا دفتر کھلا
رکھیو یا رب یہ در گنجینۂ گوہر کھلا
شب ہوئی پھر انجم رخشندہ کا منظر کھلا
اس تکلف سے کہ گویا بت کدے کا در کھلا
گرچہ ہوں دیوانہ پر کیوں دوست کا کھاؤں فریب
آستیں میں دشنہ پنہاں ہاتھ میں نشتر کھلا
گو نہ سمجھوں اس کی باتیں گو نہ پاؤں اس کا بھید
پر یہ کیا کم ہے کہ مجھ سے وہ پری پیکر کھلا
ہے خیال حسن میں حسن عمل کا سا خیال
خلد کا اک در ہے میری گور کے اندر کھلا
منہ نہ کھلنے پر ہے وہ عالم کہ دیکھا ہی نہیں
زلف سے بڑھ کر نقاب اس شوخ کے منہ پر کھلا
در پہ رہنے کو کہا اور کہہ کے کیسا پھر گیا
جتنے عرصے میں مرا لپٹا ہوا بستر کھلا
کیوں اندھیری ہے شب غم ہے بلاؤں کا نزول
آج ادھر ہی کو رہے گا دیدۂ اختر کھلا
کیا رہوں غربت میں خوش جب ہو حوادث کا یہ حال
نامہ لاتا ہے وطن سے نامہ بر اکثر کھلا
اس کی امت میں ہوں میں میرے رہیں کیوں کام بند
واسطے جس شہہ کے غالبؔ گنبد بے در کھلا
Bazm-e-shehanshah mein ash'ar ka daftar khula
Bazm-e-shehanshah mein ash'ar ka daftar khula
Rakhiyo Ya Rab yeh dar-e-ganjina-e-gauhar khula
Shab hui phir anjum-e-rakhshanda ka manzar khula
Us takalluf se ke goya but-kade ka dar khula
Garche hoon deewanapar kyon dost ka khaoon fareb
Aasteen mein dashna pinhaan haath mein nashtar khula
Go na samjhoon us ki baatein go na paaon us ka bhed
Par yeh kya kam hai ke mujh se woh pari-paikar khula
Hai khayal-e-husn mein husn-e-amal ka sa khayal
Khalad ka ek dar hai meri gor ke andar khula
Munh na khulne par hai woh alam ke dekha hi nahin
Zulf se badh kar naqab us shokh ke munh par khula
Dar pe rehne ko kaha aur keh ke kaisa phir gaya
Jitne arse mein mera lipta hua bistar khula
Kyon andheri hai shab-e-gham hai balaon ka nazool
Aaj udhar hi ko rahega deeda-e-akhtar khula
Kya rahoon ghurbat mein khush jab ho hawadis ka yeh haal
Nama lata hai watan se nama-bar aksar khula
Is ki ummat mein hoon main mere rahein kyon kaam band
Waste jis shah ke Ghalib gunbad-e-be-dar khula
شاعر کے بارے میں
غالب کا اصل نام اسد اللہ بیگ تھا، وہ 27 دسمبر 1797ء کو آگرہ میں پیدا ہوئے۔ غالب اردو کے ایک منفرد شاعر تھے ان کے بارے میں مشہور تھا کہ وہ زندگی کے...
مکمل تعارف پڑھیں