کہوں جو حال تو کہتے ہو مدعا کہیے — مرزا غالب
شاعر
کہوں جو حال تو کہتے ہو مدعا کہیے
کہوں جو حال تو کہتے ہو مدعا کہیے
تمہیں کہو کہ جو تم یوں کہو تو کیا کہیے
نہ کہیو طعن سے پھر تم کہ ہم ستم گر ہیں
مجھے تو خو ہے کہ جو کچھ کہو بجا کہیے
وہ نیشتر سہی پر دل میں جب اتر جاوے
نگاہ ناز کو پھر کیوں نہ آشنا کہیے
نہیں ذریعۂ راحت جراحت پیکاں
وہ زخم تیغ ہے جس کو کہ دل کشا کہیے
جو مدعی بنے اس کے نہ مدعی بنیے
جو ناسزا کہے اس کو نہ ناسزا کہیے
کہیں حقیقت جاں کاہیٔ مرض لکھیے
کہیں مصیبت ناسازیٔ دوا کہیے
کبھی شکایت رنج گراں نشیں کیجے
کبھی حکایت صبر گریز پا کہیے
رہے نہ جان تو قاتل کو خوں بہا دیجے
کٹے زبان تو خنجر کو مرحبا کہیے
نہیں نگار کو الفت نہ ہو نگار تو ہے
روانیٔ روش و مستیٔ ادا کہیے
نہیں بہار کو فرصت نہ ہو بہار تو ہے
طراوت چمن و خوبیٔ ہوا کہیے
سفینہ جب کہ کنارے پہ آ لگا غالبؔ
خدا سے کیا ستم و جور ناخدا کہیے
Kahoon jo haal to kehte ho mudda'a kahiye
Kahoon jo haal to kehte ho mudda'a kahiye
Tumhein kaho ke jo tum yoon kaho to kya kahiye
Na kahiyo ta'an se phir tum ke hum sitamgar hain
Mujhe to khu hai ke jo kuch kaho baja kahiye
Wo neshtar sahi par dil mein jab utar jaave
Nigah-e-naaz ko phir kyun na aashna kahiye
Nahin zariya-e-raahat jarahat-e-paikan
Wo zakhm-e-tegh hai jis ko ke dilkusha kahiye
Jo mudda'ee bane us ke na mudda'ee baniye
Jo na-saza kahe us ko na na-saza kahiye
Kahin haqeeqat-e-jaan-kahi-e-marz likhiye
Kahin museebat-e-na-sazi-e-dawa kahiye
Kabhi shikayat-e-ranj-e-giran-nasheen kije
Kabhi hikayat-e-sabr-e-gareez-pa kahiye
Rahe na jaan to qatil ko khoon-baha deeje
Kate zubaan to khanjar ko marhaba kahiye
Nahin nigar ko ulfat na ho nigar to hai
Rawani-e-rawish-o-masti-e-ada kahiye
Nahin bahar ko fursat na ho bahar to hai
Tarawat-e-chaman-o-khoobi-e-hawa kahiye
Safeena jab ke kinare pe aa laga Ghalibؔ
Khuda se kya sitam-o-jaur-e-nakhuda kahiye
شاعر کے بارے میں
غالب کا اصل نام اسد اللہ بیگ تھا، وہ 27 دسمبر 1797ء کو آگرہ میں پیدا ہوئے۔ غالب اردو کے ایک منفرد شاعر تھے ان کے بارے میں مشہور تھا کہ وہ زندگی کے...
مکمل تعارف پڑھیں