کہتے تو ہو تم سب کہ بت غالیہ مو آئے — مرزا غالب
شاعر
کہتے تو ہو تم سب کہ بت غالیہ مو آئے
کہتے تو ہو تم سب کہ بت غالیہ مو آئے
یک مرتبہ گھبرا کے کہو کوئی کہ وہ آئے
ہوں کشمکش نزع میں ہاں جذب محبت
کچھ کہہ نہ سکوں پر وہ مرے پوچھنے کو آئے
ہے صاعقہ و شعلہ و سیماب کا عالم
آنا ہی سمجھ میں مری آتا نہیں گو آئے
ظاہر ہے کہ گھبرا کے نہ بھاگیں گے نکیرین
ہاں منہ سے مگر بادۂ دوشینہ کی بو آئے
جلاد سے ڈرتے ہیں نہ واعظ سے جھگڑتے
ہم سمجھے ہوئے ہیں اسے جس بھیس میں جو آئے
ہاں اہل طلب کون سنے طعنۂ نایافت
دیکھا کہ وہ ملتا نہیں اپنے ہی کو کھو آئے
اپنا نہیں یہ شیوہ کہ آرام سے بیٹھیں
اس در پہ نہیں بار تو کعبہ ہی کو ہو آئے
کی ہم نفسوں نے اثر گریہ میں تقریر
اچھے رہے آپ اس سے مگر مجھ کو ڈبو آئے
اس انجمن ناز کی کیا بات ہے غالبؔ
ہم بھی گئے واں اور تری تقدیر کو رو آئے
Kehte to ho tum sab ke but-e-ghaliya-mo aaye
Kehte to ho tum sab ke but-e-ghaliya-mo aaye
Yak martaba ghabra ke kaho koi ke wo aaye
Hun kashmakash-e-naza mein haan jazb-e-mohabbat
Kuch keh na sakun par wo mere poochhne ko aaye
Hai sa'iqa-o-sho'la-o-seemaab ka aalam
Aana hi samajh mein meri aata nahin go aaye
Zahir hai ke ghabra ke na bhagenge nakeerain
Haan munh se magar baada-e-doshina ki boo aaye
Jallad se darte hain na wa'iz se jhgadte
Ham samjhe hue hain use jis bhes mein jo aaye
Haan ahl-e-talab kaun sune ta'ana-e-na-yaaft
Dekha ke wo milta nahin apne hi ko kho aaye
Apna nahin ye shiwa ke aaram se baithein
Is dar pe nahin baar to kaaba hi ko ho aaye
Ki hum-nafaso ne asar-e-girya mein taqreer
Achhe rahe aap us se magar mujh ko dubo aaye
Is anjuman-e-naaz ki kya baat hai Ghalibؔ
Ham bhi gaye waan aur teri taqdeer ko ro aaye
شاعر کے بارے میں
غالب کا اصل نام اسد اللہ بیگ تھا، وہ 27 دسمبر 1797ء کو آگرہ میں پیدا ہوئے۔ غالب اردو کے ایک منفرد شاعر تھے ان کے بارے میں مشہور تھا کہ وہ زندگی کے...
مکمل تعارف پڑھیں