منظور تھی یہ شکل تجلی کو نور کی — مرزا غالب
شاعر
منظور تھی یہ شکل تجلی کو نور کی
منظور تھی یہ شکل تجلی کو نور کی
قسمت کھلی ترے قد و رخ سے ظہور کی
اک خونچکاں کفن میں کروڑوں بناؤ ہیں
پڑتی ہے آنکھ تیرے شہیدوں پہ حور کی
واعظ نہ تم پیو نہ کسی کو پلا سکو
کیا بات ہے تمہاری شراب طہور کی
لڑتا ہے مجھ سے حشر میں قاتل کہ کیوں اٹھا
گویا ابھی سنی نہیں آواز صور کی
آمد بہار کی ہے جو بلبل ہے نغمہ سنج
اڑتی سی اک خبر ہے زبانی طیور کی
گو واں نہیں پہ واں کے نکالے ہوئے تو ہیں
کعبے سے ان بتوں کو بھی نسبت ہے دور کی
کیا فرض ہے کہ سب کو ملے ایک سا جواب
آؤ نہ ہم بھی سیر کریں کوہ طور کی
گرمی سہی کلام میں لیکن نہ اس قدر
کی جس سے بات اس نے شکایت ضرور کی
غالبؔ گر اس سفر میں مجھے ساتھ لے چلیں
حج کا ثواب نذر کروں گا حضور کی
Manzoor thi yeh shakal tajalli ko noor ki
Manzoor thi yeh shakal tajalli ko noor ki
Qismat khuli tere qad-o-rukh se zahoor ki
Ek khoonchakaan kafan mein karodon banao hain
Padti hai aankh tere shaheedon pe hoor ki
Wa'iz na tum piyo na kisi ko pila sako
Kya baat hai tumhari sharab-e-tahoor ki
Ladta hai mujh se hashar mein qatil ke kyun utha
Goya abhi suni nahin awaaz-e-soor ki
Aamad bahar ki hai jo bulbul hai naghma-sanj
Udti si ek khabar hai zabani-e-tuyoor ki
Go waan nahin pe waan ke nikale hue to hain
Kaabe se in buton ko bhi nisbat hai door ki
Kya farz hai ke sab ko mile ek sa jawab
Aao na hum bhi sair karein koh-e-toor ki
Garmi sahi kalam mein lekin na is qadar
Ki jis se baat us ne shikayat zaroor ki
Ghalib gar is safar mein mujhe saath le chalein
Haj ka sawab nazr karoon ga Huzoor ki
شاعر کے بارے میں
غالب کا اصل نام اسد اللہ بیگ تھا، وہ 27 دسمبر 1797ء کو آگرہ میں پیدا ہوئے۔ غالب اردو کے ایک منفرد شاعر تھے ان کے بارے میں مشہور تھا کہ وہ زندگی کے...
مکمل تعارف پڑھیں