وارستہ اس سے ہیں کہ محبت ہی کیوں نہ ہو — مرزا غالب
شاعر
وارستہ اس سے ہیں کہ محبت ہی کیوں نہ ہو
وارستہ اس سے ہیں کہ محبت ہی کیوں نہ ہو
کیجے ہمارے ساتھ عداوت ہی کیوں نہ ہو
چھوڑا نہ مجھ میں ضعف نے رنگ اختلاط کا
ہے دل پہ بار نقش محبت ہی کیوں نہ ہو
ہے مجھ کو تجھ سے تذکرۂ غیر کا گلہ
ہر چند بر سبیل شکایت ہی کیوں نہ ہو
پیدا ہوئی ہے کہتے ہیں ہر درد کی دوا
یوں ہو تو چارۂ غم الفت ہی کیوں نہ ہو
ڈالا نہ بے کسی نے کسی سے معاملہ
اپنے سے کھینچتا ہوں خجالت ہی کیوں نہ ہو
ہے آدمی بجائے خود اک محشر خیال
ہم انجمن سمجھتے ہیں خلوت ہی کیوں نہ ہو
ہنگامۂ زبونی ہمت ہے انفعال
حاصل نہ کیجے دہر سے عبرت ہی کیوں نہ ہو
وارستگی بہانۂ بیگانگی نہیں
اپنے سے کر نہ غیر سے وحشت ہی کیوں نہ ہو
مٹتا ہے فوت فرصت ہستی کا غم کوئی
عمر عزیز صرف عبادت ہی کیوں نہ ہو
اس فتنہ خو کے در سے اب اٹھتے نہیں اسدؔ
اس میں ہمارے سر پہ قیامت ہی کیوں نہ ہو
Wa-rasta is se hain ki muhabbat hi kyon na ho
Wa-rasta is se hain ki muhabbat hi kyon na ho
Kijiye hamare saath adawat hi kyon na ho
Chhoda na mujh mein za'f ne rang-e-ikhtilat ka
Hai dil pe baar naqsh-e-muhabbat hi kyon na ho
Hai mujh ko tujh se tazkira-e-ghair ka gila
Har chand bar sabeel-e-shikayat hi kyon na ho
Paida hui hai kehte hain har dard ki dawa
Yun ho to chara-e-gham-e-ulfat hi kyon na ho
Daala na be-kasi ne kisi se mu'amla
Apne se khenchta hoon khijalat hi kyon na ho
Hai aadmi bajaye khud ik mahshar-e-khayal
Hum anjuman samajhte hain khalwat hi kyon na ho
Hangama-e-zabooni-e-himmat hai infi'al
Hasil na kijiye dahr se ibrat hi kyon na ho
Waa-rastagi bahana-e-begangi nahin
Apne se kar na ghair se wahshat hi kyon na ho
Mitta hai faut-e-fursat-e-hasti ka gham koi
Umr-e-aziz sarf-e-ibadat hi kyon na ho
Is fitna-khu ke dar se ab uthte nahin Asad
Is mein hamare sar pe qayamat hi kyon na ho
شاعر کے بارے میں
غالب کا اصل نام اسد اللہ بیگ تھا، وہ 27 دسمبر 1797ء کو آگرہ میں پیدا ہوئے۔ غالب اردو کے ایک منفرد شاعر تھے ان کے بارے میں مشہور تھا کہ وہ زندگی کے...
مکمل تعارف پڑھیں