ہر ایک شب یوں ہی دیکھیں گی سوئے در آنکھیں — محسن نقوی
شاعر
ہر ایک شب یوں ہی دیکھیں گی سوئے در آنکھیں
ہر ایک شب یوں ہی دیکھیں گی سوئے در آنکھیں
تجھے گنوا کے نہ سوئیں گی عمر بھر آنکھیں
طلوع صبح سے پہلے ہی بجھ نہ جائیں کہیں
یہ دشت شب میں ستاروں کی ہم سفر آنکھیں
ستم یہ کم تو نہیں دل گرفتگی کے لئے
میں شہر بھر میں اکیلا ادھر ادھر آنکھیں
شمار اس کی سخاوت کا کیا کریں کہ وہ شخص
چراغ بانٹتا پھرتا ہے چھین کر آنکھیں
میں زخم زخم ہوا جب تو مجھ پہ بھید کھلا
کہ پتھروں کو سمجھتی رہیں گہر آنکھیں
میں اپنے اشک سنبھالوں گا کب تلک محسنؔ
زمانہ سنگ بکف ہے تو شیشہ گر آنکھیں
Har ek shab yūñ hī dekheñgī sū-e-dar āñkheñ
Har ek shab yūñ hī dekheñgī sū-e-dar āñkheñ
Tujhe gañvā ke na so.eñgī umr bhar āñkheñ
Tulū'-e-sub.h se pahle hī bujh na jā.eñ kahīñ
Ye dasht-e-shab meñ sitāroñ kī ham-safar āñkheñ
Sitam ye kam to nahīñ dil-giriftagī ke liye
Maiñ shahr bhar meñ akelā idhar udhar āñkheñ
Shumār us kī saḳhāvat kā kyā kareñ ki vo shaḳhs
Chirāġh bāñṭtā phirtā hai chhīn kar āñkheñ
Maiñ zaḳhm zaḳhm huā jab to mujh pe bhed khulā
Ki pattharoñ ko samajhtī rahīñ gauhar āñkheñ
Maiñ apne ashk sambhālūñgā kab talak 'Mohsin'
Zamāna sang-ba-kaf hai to shīsha-gar āñkheñ
شاعر کے بارے میں
سید محسن نقوی (اصل نام: سید غلام عباس نقوی) اردو کے ان ممتاز اور اثر انگیز شعرا میں شمار ہوتے ہیں جنہوں نے مختصر عمر میں گہرا اور دیرپا ادبی نقش چھ...
مکمل تعارف پڑھیں