بسکہ دشوار ہے اس شخص کا چہرا لکھنا — محسن زیدی
شاعر
بسکہ دشوار ہے اس شخص کا چہرا لکھنا
بسکہ دشوار ہے اس شخص کا چہرا لکھنا
ورنہ مشکل تو نہیں کوئی سراپا لکھنا
یہ بھی ممکن ہے کہ تحریر بدل دی جائے
دوستو اپنا بیاں خون سے پختہ لکھنا
کچھ ہمیں سیر و تماشا سے نہیں دلچسپی
شغل بس اپنا ہے تنہائی میں پڑھنا لکھنا
دل کا دروازہ تمہارے لئے وا رکھیں گے
لوٹ آنے کا کبھی ہو جو ارادہ لکھنا
بھیج تو سکتے ہو تم لکھ کے شکایت ان کو
شرط بس یہ ہے کہ کوئی لفظ نہ چبھتا لکھنا
لوگ اسناد کے کشکول لیے پھرتے ہیں
کتنا بے سود ہے اس دور میں پڑھنا لکھنا
کیسے دیوانے ہیں لکھتے ہوئے تھکتے ہی نہیں
ایک ہی لفظ کو سیدھا کبھی الٹا لکھنا
پاس تہذیب تو کچھ پاس قلم ہے ہم کو
ورنہ آتا ہے ہمیں جیسے کو تیسا لکھنا
لوگ جب لکھ کے سیہ کر گئے دیواریں تک
کون پڑھتا ہے بھلا ریت پہ میرا لکھنا
سر میں سودا تھا عجب لکھ گیا اس کو کیا کچھ
دل نے سمجھایا بہت تھا کہ نہ ایسا لکھنا
یاد کیا رکھتا کہ وہ زود فراموش بھی تھا
میں بھی کچھ بھول گیا اس کو تقاضا لکھنا
لکھتے ہی جائیں گے ہم ان کو عریضے محسنؔ
وہ پڑھیں یا نہ پڑھیں کام ہے اپنا لکھنا
Bas-ke dushwaar hai us shakhs ka chehra likhna
Bas-ke dushwaar hai us shakhs ka chehra likhna
Warna mushkil to nahin koi sarapa likhna
Ye bhi mumkin hai ke tehreer badal di jaaye
Dosto apna bayan khoon se pukhta likhna
Kuchh hamein sair-o-tamasha se nahin dilchaspi
Shughl bas apna hai tanhayi mein padhna likhna
Dil ka darwaza tumhare liye wa rakhenge
Laut aane ka kabhi ho jo irada likhna
Bhej to sakte ho tum likh ke shikayat un ko
Shart bas ye hai ke koi lafz na chubhta likhna
Log asnaad ke kashkol liye phirte hain
Kitna be-sood hai is daur mein padhna likhna
Kaise deewane hain likhte hue thakte hi nahin
Ek hi lafz ko seedha kabhi ulta likhna
Paas tehzeeb to kuchh paas qalam hai hum ko
Warna aata hai hamein jaise ko taisa likhna
Log jab likh ke siyah kar gaye deewarein tak
Kaun padhta hai bhala ret pe mera likhna
Sar mein sauda tha ajab likh gaya us ko kya kuchh
Dil ne samjhaya bahut tha ke na aisa likhna
Yaad kya rakhta ke wo zood-faramosh bhi tha
Main bhi kuchh bhool gaya us ko taqaza likhna
Likhte hi jaayenge hum un ko areeze Mohsin
Wo padhein ya na padhein kaam hai apna likhna
شاعر کے بارے میں
محسن زیدی، پورا نام سید محسن رضا زیدی اور قلمی نام محسن، اردو غزل کے ایک معتبر اور باوقار شاعر تھے۔ ان کی پیدائش 10 جولائی 1935ء کو بہرائچ، اتر پرد...
مکمل تعارف پڑھیں