لگے خدنگ جب اس نالۂ سحر کا سا — مومن خان مومن
شاعر
لگے خدنگ جب اس نالۂ سحر کا سا
لگے خدنگ جب اس نالۂ سحر کا سا
فلک کا حال نہ ہو کیا مرے جگر کا سا
نہ جاؤں گا کبھی جنت میں میں نہ جاؤں گا
اگر نہ ہووے گا نقشہ تمہارے گھر کا سا
کرے نہ خانہ خرابی تری ندامت جور
کہ آب شرم میں ہے جوش چشم تر کا سا
یہ جوش یاس تو دیکھو کہ اپنے قتل کے وقت
دعائے وصل نہ کی وقت تھا اثر کا سا
لگے ان آنکھوں سے ہر وقت اے دل صد چاک
ترا نہ رتبہ ہوا کیوں شگاف در کا سا
ذرا ہو گرمی صحبت تو خاک کر دے چرخ
مرا سرور ہے گل خندۂ شرر کا سا
یہ ناتواں ہوں کہ ہوں اور نظر نہیں آتا
مرا بھی حال ہوا تیری ہی کمر کا سا
جنون کے جوش سے بیگانہ وار ہیں احباب
ہمارا حال وطن میں ہوا سفر کا سا
خبر نہیں کہ اسے کیا ہوا پر اس در پر
نشان پا نظر آتا ہے نامہ بر کا سا
دل ایسے شوخ کو مومنؔ نے دے دیا کہ وہ ہے
محب حسین کا اور دل رکھے شمر کا سا
lage khadang jab is nala-e-sahar ka sa
lage khadang jab is nala-e-sahar ka sa
falak ka haal na ho kya mere jigar ka sa
na jaunga kabhi jannat mein main na jaunga
agar na hove ga naqsha tumhare ghar ka sa
kare na khana-kharabi teri nadamat-e-jaur
ki aab-e-sharm mein hai josh chashm-e-tar ka sa
ye josh-e-yaas to dekho ki apne qatl ke waqt
dua-e-vasl na ki waqt tha asar ka sa
lage in aankhon se har waqt ae dil sad-chaak
tera na rutba hua kyun shigaf-e-dar ka sa
zara ho garmi-e-sohbat to khak kar de charakh
mera suroor hai gul-khanda-e-sharar ka sa
ye natavan hun ki hun aur nazar nahin aata
mera bhi haal hua teri hi kamar ka sa
junun ke josh se begana-war hain ahbab
hamara haal watan mein hua safar ka sa
khabar nahin ki use kya hua par is dar par
nishan-e-pa nazar aata hai nama-bar ka sa
dil aise shokh ko Momin! ne de diya ki wo hai
muhibb-e-Husain ka aur dil rakhe shimr ka sa
شاعر کے بارے میں
مومن خان مومن اردو کے کلاسیکی عہد کے اُن ممتاز شعرا میں شمار ہوتے ہیں جنہوں نے غزل کو نیا ذوق، نئی لطافت اور گہری جذباتی معنویت عطا کی۔ ان کا اصل ن...
مکمل تعارف پڑھیں