ساحر بھوپالی

ہر اک منزل ہر اک ساحل ہر اک طوفاں سے ٹکرائی

ہر اک منزل ہر اک ساحل ہر اک طوفاں سے ٹکرائی
مری وحشت غرض کل عالم امکاں سے ٹکرائی
یکایک رہ گئی دنیائے ارماں سرنگوں ہو کر
نگاہ بے کساں جب بھی رخ تاباں سے ٹکرائی
ہنسی آ ہی گئی اس دم مجھے جبر مشیت پر
کبھی جب تلخیٔ غربت مرے وجداں سے ٹکرائی
یکایک رہ گئی دنیائے ارماں سرنگوں ہو کر
نگاہ بے کساں جب بھی رخ تاباں سے ٹکرائی
رہا کوتاہ دامانی کا شکوہ سر بہ سر مجھ کو
تری نظر کرم جب وسعت ارماں سے ٹکرائی
تعجب ہی رہا غم خواریوں کو سخت جانی پر
مری ایذا پسندی جب غم درماں سے ٹکرائی
ہم اس دم خیریت پوچھیں گے واعظ سے کہ جب کوئی
نگاہ کفر ساماں خرمن ایماں سے ٹکرائی
رہی ساحرؔ ہمیشہ بندگی میں شان یزدانی
میں وہ بندہ ہوں جس کی بندگی یزداں سے ٹکرائی

ساحر بھوپالی