جلتی کو مت اور جلاؤ، آجاؤ

جلتی کو مت اور جلاؤ، آجاؤ
مت سورج سے آنکھ ملاؤ، آجاؤ
سوچوں کا دریا تم کو لے ڈوبے گا
دیکھو اتنی دور نہ جاؤ، آجاؤ
شہر کے لوگ تو چیخ پکار نہیں سنتے
میرے کان میں بات بتاؤ، آجاؤ
تم بھی تو بیتاب تھے مجھ سے ملنے کو
دور کھڑے ہو مت شرماؤ، آجاؤ
میں نے تم کو دیکھ کے بازو کھولے ہیں
میرے سینے سے لگ جاؤ، آجاؤ
لوگ کہیں تقسیم مجھے نہ کر ڈالیں
جلدی آؤ، آ بھی جاؤ، آجاؤ
بعد میں دل کی بات تمہیں سمجھاؤں گا
پہلے آ کر تم سمجھاؤ، آجاؤ
یوں میں تم کو روز بلایا کرتا ہوں
آؤ، آؤ، آؤ، آؤ، آجاؤ

زین شکیل

زین شکیل

شاعر

جلتی کو مت اور جلاؤ، آجاؤ