فریب حسن سے گبر و مسلماں کا چلن بگڑا — آواز: ایمان | شاعر: حیدر علی آتش
مقرر / سپیکر
فریب حسن سے گبر و مسلماں کا چلن بگڑا
فریب حسن سے گبر و مسلماں کا چلن بگڑا
خدا کی یاد بھولا شیخ بت سے برہمن بگڑا
قبائے گل کو پھاڑا جب مرا گل پیرہن بگڑا
بن آئی کچھ نہ غنچے سے جو وہ غنچہ دہن بگڑا
نہیں بے وجہ ہنسنا اس قدر زخم شہیداں کا
تری تلوار کا منہ کچھ نہ کچھ اے تیغ زن بگڑا
تکلف کیا جو کھوئی جان شیریں پھوڑ کر سر کو
جو تھی غیرت تو پھر خسرو سے ہوتا کوہ کن بگڑا
کسی چشم سیہ کا جب ہوا ثابت میں دیوانہ
تو مجھ سے سست ہاتھی کی طرح جنگلی ہرن بگڑا
اثر اکسیر کا یمن قدم سے تیری پایا ہے
جذامی خاک رہ مل کر بناتے ہیں بدن بگڑا
تری تقلید سے کبک دری نے ٹھوکریں کھائیں
چلا جب جانور انساں کی چال اس کا چلن بگڑا
زوال حسن کھلواتا ہے میوے کی قسم مجھ سے
لگایا داغ خط نے آن کر سیب ذقن بگڑا
رخ سادہ نہیں اس شوخ کا نقش عداوت سے
نظر آتے ہی آپس میں ہر اہل انجمن بگڑا
جو بد خو طفل اشک اے چشم تر ہیں دیکھنا اک دن
گھروندے کی طرح سے گنبد چرخ کہن بگڑا
صف مژگاں کی جنبش کا کیا اقبال نے کشتہ
شہیدوں کے ہوئے سالار جب ہم سے تمن بگڑا
کسی کی جب کوئی تقلید کرتا ہے میں روتا ہوں
ہنسا گل کی طرح غنچہ جہاں اس کا دہن بگڑا
کمال دوستی اندیشۂ دشمن نہیں رکھتا
کسی بھونرے سے کس دن کوئی مار یاثمن بگڑا
رہی نفرت ہمیشہ داغ عریانی کو پھائے سے
ہوا جب قطع جامہ پر ہمارے پیرہن بگڑا
رگڑوائیں یہ مجھ سے ایڑیاں غربت میں وحشت نے
ہوا مسدود رستہ جادۂ راہ وطن بگڑا
کہا بلبل نے جب توڑا گل سوسن کو گلچیں نے
الٰہی خیر کیجو نیل رخسار چمن بگڑا
ارادہ میرے کھانے کا نہ اے زاغ و زغن کیجو
وہ کشتہ ہوں جسے سونگھے سے کتوں کا بدن بگڑا
امانت کی طرح رکھا زمیں نے روز محشر تک
نہ اک مو کم ہوا اپنا نہ اک تار کفن بگڑا
جہاں خالی نہیں رہتا کبھی ایذا دہندوں سے
ہوا ناسور نو پیدا اگر زخم کہن بگڑا
تونگر تھا بنی تھی جب تک اس محبوب عالم سے
میں مفلس ہو گیا جس روز سے وہ سیم تن بگڑا
لگے منہ بھی چڑھانے دیتے دیتے گالیاں صاحب
زباں بگڑی تو بگڑی تھی خبر لیجے دہن بگڑا
بناوٹ کیف مے سے کھل گئی اس شوخ کی آتشؔ
لگا کر منہ سے پیمانے کو وہ پیماں شکن بگڑا
شاعر: حیدر علی آتش
آواز: ایمان
Fareb-e-husn se gabr-o-musalman ka chalan bigda
Fareb-e-husn se gabr-o-musalman ka chalan bigda
Khuda ki yaad bhoola shaikh but se barahman bigda
Qaba-e-gul ko phaada jab mera gul pairahan bigda
Ban aayi kuchh na ghunche se jo wo ghuncha dahan bigda
Nahin be wajah hansna is qadar zakhm-e-shaheedan ka
Teri talwar ka munh kuchh na kuchh ae teghzan bigda
Takalluf kya jo khoi jaan-e-Shireen phod kar sar ko
Jo thi ghairat to phir Khusrau se hota kohkan bigda
Kisi chashm-e-siyah ka jab hua sabit main deewana
To mujh se sust hathi ki tarah jungli haran bigda
Asar ikseer ka yumn-e-qadam se teri paya hai
Juzami khak-e-rah mil kar banate hain badan bigda
Teri taqleed se kabk-e-dari ne thokarein khayeen
Chala jab janwar insaan ki chaal us ka chalan bigda
Zawal-e-husn khilwata hai meway ki qasam mujh se
Lagaya daagh-e-khat ne aan kar seib-e-zaqan bigda
Rukh-e-sada nahin us shokh ka naqsh-e-adawat se
Nazar aate hi aapas mein har ahl-e-anjuman bigda
Jo bad-khu tifl-e-ashk ae chashm-e-tar hain dekhna ek din
Gharonde ki tarah se gumbad-e-charkh-e-kohan bigda
Saf-e-mizgan ki jumbish ka kya Iqbal ne kushta
Shaheedon ke hue salar jab hum se taman bigda
Kisi ki jab koi taqleed karta hai main rota hoon
Hansa gul ki tarah ghuncha jahan us ka dahan bigda
Kamal-e-dosti andesha-e-dushman nahin rakhta
Kisi bhonwre se kis din koi maar yaasman bigda
Rahi nafrat hamesha daagh-e-uryani ko phaaye se
Hua jab qata-e-jama par hamare pairahan bigda
Ragadvayein ye mujh se ediyan gurbat mein wahshat ne
Hua masdood rasta jada-e-raah-e-watan bigda
Kaha bulbul ne jab toda gul-e-sosun ko gulchin ne
Ilahi khair keejo neel-e-rukhsar-e-chaman bigda
Irada mere khane ka na ae zag-h-o-zaghan keejo
Wo kushta-e-hoon jise soonghe se kutton ka badan bigda
Amanat ki tarah rakha zameen ne roz-e-mehshar tak
Na ek moo kam hua apna na ek taar-e-kafan bigda
Jahan khali nahin rehta kabhi eeza dahindon se
Hua nasoor nau paida agar zakhm-e-kohan bigda
Tawanagar tha bani thi jab tak is mahboob-e-alam se
Main muflis ho gaya jis roz se wo seem tan bigda
Lage munh bhi chadhane dete dete galiyan Sahib
Zaban bigdi to bigdi thi khabar leejiye dahan bigda
Banawat kaif-e-mai se khul gayi us shokh ki Atish!
Laga kar munh se paimane ko wo paimaan-shikan bigda
مقرر کے بارے میں
خود پرستی میں رہوں تو مٹی سے بھی کھیلتی ہوں اناپرستی میں آ جاؤں تو چاند کو بھی نظرانداز کر دوں
مکمل سوانح دیکھیں