صلیبِ مرگ پہ آؤ بدن اتارتے ہیں — آواز: ایمان | شاعر: کومل جوئیہ

صلیبِ مرگ پہ آؤ بدن اتارتے ہیں

صلیبِ مرگ پہ آؤ بدن اتارتے ہیں
تمام عمر کی لادی تھکن اتارتے ہیں
وہ میری ذات سے یوں منحرف ہوا جیسے
کسی قمیض سے ، ٹوٹے بٹن اتارتے ہیں
غزال شخص ! تم اِتراو ، حق بھی بنتا ہے
تمہاری آنکھ کا صدقہ ہرن اتارتے ہیں
ہر ایک سانس کٹ جاتی ہے سود بھرتے ہوئے
یہ قرضِ زندگی سب مرد و زن اتارتے ہیں
عطا ہر ایک پہ ہوتی نہیں کہ مالکِ کُن
چنیدہ لوگوں پہ رزق سخن اتارتے ہیں
جو عشق گھول کے دیتے ہیں میٹھے لہجوں میں
رگوں میں زہر بھی وہ دفعتاً اتارتے ہیں
گلے لگاؤ کہ تھک جانے والے لوگوں کو
دلاسہ دیتے ہیں ، دل کی گھٹن اتارتے ہیں

شاعر: کومل جوئیہ

آواز: ایمان