تمہیں لکھنا نہ آتا تھا — آواز: ایمان | شاعر: عشرت آفریں

Tumhein likhna na aata tha

Suna hai tum mannon mitti tale araam karti ho
Tum aur araam na mumkin
Suna hai maut se bhi aakhri dam tak ladai ki
Mujhe maloom hai tum kitni ziddi thin
Qasam un khurdure haathon ki
Main jin mein qalam pakde hue hoon
Nihayat be-eemani se
Tumhein har baar main tum se chura kar nazm banti hoon
Kahani kaadhti hoon
Aur sab se jhoot kehti hoon
Ke saare harf mere hi hain
Suna hai jis ghadi duniya mein main aai
Tumhi ne shehad bhi mujh ko chataya
Reshmi ungli se kaajal bhi lagaya tha
Woh pehla shehad ka qatra
Mere sher'on mein ras ban kar mehakta hai
To mujh par daad aur tehseen ki barsaat hoti hai
Woh kaajal reshmi ungli se jo tum ne lagaya tha
Meri aankhon mein aisa noor laya
Ke jo neki badi mein khatt-e-faasil kheench deta hai
Tarai ke bahut chhote se qasbe ke
Kisi khamosh aangan mein
Mujhe tum doodh chawal
Chaand ki meethi katori mein khilati thin
To Rani Ketki wali kahani bhi sunati thin
Kabhi tum apne pehlu mein leta kar
Aasmaan ke nit naye asraar samjhatin
Woh dekho
Kehkashaan kehte hain jis ko yeh haqeeqat mein
Nabi ji ki sawari ke qadam ki dhool hai saari
Kabhi tum dil-nasheen awaaz mein lori sunati thin
Magar main bhi tumhari hi tarah ki ek ziddi thi
Mujhe kab neend aati thi
Tumhari reshmi ungli pakad kar main
Anokhi kehkashaon ke safar par chal nikalti thi
Anokhi kehkashayen jo gali koochon mein bikhri thin
Woh ik na-beena budhiya
Jis ke toote jhonpde mein
Shab ki tareeki mein tum ja kar
Niwala apne haathon se khilati thin
Mohalle mein koi bachcha jo aadhi raat ko rota
To tum bechain hi rehti thin jab tak ho na aati thin
Tumhein bachchon se aur bachchon ko tum se ishq tha goya
Kaha jaata hai tum dushman banane mein bhi mahir thin
Harees aisi
Ke kam qeemat koi malboos nazron mein na laati thin
Ghani aisi
Ke ik luqma na marzi ke khilaaf apne uthati thin
Ra'unat aur darweshi
Tumhari zaat ke ik mantaqe par aan milte the
Shikayat, ranj, beemari
Yeh woh alfaaz the jin ko
Lughat se apni kharij kar diya tha jaane kab tum ne
Suna yeh hai tumhein Quran bhi achhi tarah padhna na aata tha
Magar main ne to yeh dekha
Gali ke kitne hi aawara kutte dum daba kar baith jaate the
Tumhari ek samm aur bakman ki tilawat se
Tumhare haath ke meethe malide mein
Jo dargahon ki khushboo thi
Main likhna chahti hoon to
Simat kar jazb ho jaati hai kaghaz mein
Tumhare popule honthon ka nazuk kham
Ik aisa harf-e-abjad tha
Jise jitna main padhti hoon
Naye asraar khulte hain
Roopheli jild ki afshaan bikhar jaati hai kaghaz par
Kabhi qirtaas par tum jhuriyon mein jhilmilati ho
Hamesha ki tarah se meethe meethe muskurati ho
To apne khurdure haathon ko main hairat se takti hoon
Suna yeh hai tumhein likhna na aata tha
Tumhare haath ki kapde ki gudiya
Aur gulaabi rang ki mitti ki chidiya
Lafz ban kar jab bhi kaghaz par chehakti hain
Main chalaki se hansti hoon
Chalo achha hai logon ko yehi maloom hai ab tak
Tumhein likhna na aata tha