چاہتا ہوں کہ نظر نور سے مانوس نہ ہو — آواز: نور مائیر | شاعر: عمیر نجمی

چاہتا ہوں کہ نظر نور سے مانوس نہ ہو

چاہتا ہوں کہ نظر نور سے مانوس نہ ہو
روشنی ہو مگر اتنی ہو کہ محسوس نہ ہو
کیسے کھل پائے یہ رعشہ ہے کہ بھونچال اگر
کمرے کی چھت سے لٹکتا ہوا فانوس نہ ہو
زندگی لمبی تو ہو سکتی ہے بے انت نہیں
خود کشی کی بھی سہولت ہے تو مایوس نہ ہو
تو دعا کر کہ میں روتا رہوں صحرا نہ بنوں
خاک اور نم کا تناسب کبھی معکوس نہ ہو
جسم کا امن سبوٹاژ کئے رکھتی ہے
روح دراصل سماوات کی جاسوس نہ ہو
کوئی آسیب بھی چھیڑے نہ مری تنہائی
ایسا گھر دیکھ جو خالی تو ہو منحوس نہ ہو
اب یہ زردی بھی بھگتنا تو پڑے گی کچھ دن
میں نہ کہتا تھا ہرے رنگ میں ملبوس نہ ہو

شاعر: عمیر نجمی

آواز: نور مائیر