یہ آرزو تھی تجھے گل کے رو بہ رو کرتے — آواز: نور مائیر | شاعر: حیدر علی آتش
مقرر / سپیکر
یہ آرزو تھی تجھے گل کے رو بہ رو کرتے
یہ آرزو تھی تجھے گل کے رو بہ رو کرتے
ہم اور بلبل بیتاب گفتگو کرتے
پیامبر نہ میسر ہوا تو خوب ہوا
زبان غیر سے کیا شرح آرزو کرتے
مری طرح سے مہ و مہر بھی ہیں آوارہ
کسی حبیب کی یہ بھی ہیں جستجو کرتے
ہمیشہ رنگ زمانہ بدلتا رہتا ہے
سفید رنگ ہیں آخر سیاہ مو کرتے
لٹاتے دولت دنیا کو میکدے میں ہم
طلائی ساغر مے نقرئی سبو کرتے
ہمیشہ میں نے گریباں کو چاک چاک کیا
تمام عمر رفوگر رہے رفو کرتے
جو دیکھتے تری زنجیر زلف کا عالم
اسیر ہونے کی آزاد آرزو کرتے
بیاض گردن جاناں کو صبح کہتے جو ہم
ستارۂ سحری تکمۂ گلو کرتے
یہ کعبے سے نہیں بے وجہ نسبت رخ یار
یہ بے سبب نہیں مردے کو قبلہ رو کرتے
سکھاتے نالۂ شبگیر کو در اندازی
غم فراق کا اس چرخ کو عدو کرتے
وہ جان جاں نہیں آتا تو موت ہی آتی
دل و جگر کو کہاں تک بھلا لہو کرتے
نہ پوچھ عالم برگشتہ طالعی آتشؔ
برستی آگ جو باراں کی آرزو کرتے
شاعر: حیدر علی آتش
آواز: نور مائیر
Ye ārzū thī tujhe gul ke rū-ba-rū karte
Ye ārzū thī tujhe gul ke rū-ba-rū karte
Ham aur bulbul-e-betāb guftugū karte
Payambar na muyassar huā to khūb huā
Zabān-e-ghair se kyā sharh-e-ārzū karte
Mirī tarah se mah o mehar bhī haiñ āvāra
Kisī habīb kī ye bhī haiñ justujū karte
Hamesha rang-e-zamāna badaltā rahtā hai
Safed rang haiñ ākhir siyāh mū karte
Luṭāte daulat-e-duniyā ko maikade meñ ham
Talā.ī sāghar-e-may, nuqra.ī subū karte
Hamesha maiñ ne garebāñ ko chāk chāk kiyā
Tamām umr rafūgar rahe rafū karte
Jo dekhte tirī zanjīr-e-zulf kā ālam
Asīr hone kī āzād ārzū karte
Bayāz-e-gardan-e-jānāñ ko sub.h kahte jo ham
Sitāra-e-sahharī takma-e-gulū karte
Ye Ka'abe se nahīñ be-wajah nisbat-e-rukh-e-yār
Ye be-sabab nahīñ murde ko qibla-rū karte
Sikhāte nāla-e-shabgīr ko dar-andāzī
Gham-e-firāq kā us charkh ko adū karte
Vo jān-e-jāñ nahīñ ātā to maut hī ātī
Dil o jigar ko kahāñ tak bhalā lahū karte
Na pūchh ālam-e-bargashta-tāli'ī Atish
Barastī āg jo bārāñ kī ārzū karte