یہ نظر کی زد ہے ظالم مرا دم نکل نہ جائے — آواز: افتخار احمد | شاعر: پیر نصیرالدین

یہ نظر کی زد ہے ظالم مرا دم نکل نہ جائے

یہ نظر کی زد ہے ظالم مرا دم نکل نہ جائے
مجھے صرف اس کا ڈر ہے کہ یہ تیر چل نہ جائے
وہ اٹھی ہے آتش غم کی نفس نفس ہے سوزاں
مری روح تپ نہ اٹھے مرا جسم جل نہ جائے
مرے رازداں سے ہنس کر وہ خطاب کر رہے ہیں
کہیں تھپکیوں میں آکر کوئی راز اگل نہ جائے
تری بزم میں جو ہم ہیں تو یہاں پہ غیر کیوں ہو
یہ خلش نکل نہ جائے یہ عذاب ٹل نہ جائے
وہ اٹھا رہے ہیں چلمن وہ دکھا رہے ہیں صورت
کہیں ہوش اڑ نہ جائیں کہیں دل مچل نہ جائے
میں چراغ ناتواں ہوں کوئی دم کا میہماں ہوں
مرے سامنے سے اٹھ کر کوئی ایک پل نہ جائے
وہ نصیرؔ سن رہے ہیں مرے درد کا فسانہ
مجھے ہر گھڑی ہے دھڑکا کہیں رخ بدل نہ جائے

شاعر: پیر نصیرالدین

آواز: افتخار احمد