کرتے نہ ہم جو اہل وطن اپنا گھر خراب — آواز: ملک | شاعر: باصر سلطان کاظمی

کرتے نہ ہم جو اہل وطن اپنا گھر خراب

کرتے نہ ہم جو اہل وطن اپنا گھر خراب
ہوتے نہ یوں ہمارے جواں در بدر خراب
اعمال کو پرکھتی ہے دنیا مآل سے
اچھا نہ ہو ثمر تو ہے گویا شجر خراب
اک بار جو اتر گیا پٹری سے دوستو
دیکھا یہی کہ پھر وہ ہوا عمر بھر خراب
منزل تو اک طرف رہی اتنا ضرور ہے
اک دوسرے کا ہم نے کیا ہے سفر خراب
ہوتی نہیں وہ پوری طرح پھر کبھی بھی ٹھیک
ہو جائے ایک بار کوئی چیز گر خراب
اے دل مجھے پتا ہے کہ لایا ہے تو کہاں
چل خود بھی اب خراب ہو مجھ کو بھی کر خراب
اس کاروبار عشق میں ایسی ہے کیا کشش
پہلے پدر خراب ہوا پھر پسر خراب
اک دن بھی آشیاں میں نہ گزرا سکون سے
کرتے رہے ہیں مجھ کو مرے بال و پر خراب
رہ رہ کے یاد آتی ہے استاد کی یہ بات
کرتی ہے آرزوئے کمال ہنر خراب
اس تیرہ خاکداں کے لیے کیا بلا سبب
صدیوں سے ہو رہے ہیں یہ شمس و قمر خراب
لگتا ہے ان کو زنگ کسی اور رنگ کا
کس نے کہا کہ ہوتے نہیں سیم و زر خراب
اک قدرداں ملا تو یہ سوچا کہ آج تک
ہوتے رہے کہاں مرے لعل و گہر خراب
خاموش اور اداس ہو باصرؔ جو صبح سے
آئی ہے آج پھر کوئی گھر سے خبر خراب

شاعر: باصر سلطان کاظمی

آواز: ملک