ایک آرزو — علامہ اقبال

ایک آرزو

Duniya ki mehfilon se ukta gaya hoon Ya Rab
Kya lutf anjuman ka jab dil hi bujh gaya ho
Shorish se bhaagta hoon dil dhoondhta hai mera
Aisa sukoot jis par taqreer bhi fida ho
Marta hoon khamoshi par yeh aarzoo hai meri
Daaman mein koh ke ik chhota sa jhonpra ho
Azaad fikr se hoon uzlat mein din guzaaroon
Duniya ke gham ka dil se kaanta nikal gaya ho
Lazzat surood ki ho chidiyon ke chehchahon mein
Chashme ki shorishon mein baaja sa baj raha ho
Gul ki kali chatak kar paigham de kisi ka
Saaghar zara sa goya mujh ko jahan numa ho
Ho haath ka sirhana sabze ka ho bichhona
Sharmaye jis se jalwat khalwat mein woh ada ho
Maanoos is qadr ho soorat se meri bulbul
Nanhe se dil mein us ke khatka na kuch mera ho
Saf bandhe dono jaanib boote hare hare hon
Nadi ka saaf paani tasveer le raha ho
Ho dil fareb aisa kohsaar ka nazara
Paani bhi mauj ban kar uth uth ke dekhta ho
Aaghosh mein zameen ki soya hua ho sabza
Phir phir ke jhaadiyon mein paani chamak raha ho
Paani ko chhoo rahi ho jhuk jhuk ke gul ki tehni
Jaise haseen koi aaina dekhta ho
Mehndi lagaye suraj jab shaam ki dulhan ko
Surkhi liye sunahri har phool ki qaba ho
Raaton ko chalne wale reh jaayen thak ke jis dam
Ummeed un ki mera toota hua diya ho
Bijli chamak ke un ko kutiya meri dikha de
Jab aasmaan pe har soo baadal ghira hua ho
Pichhle pehar ki koyal woh subah ki muezzin
Main us ka hamnawa hoon woh meri hamnawa ho
Kanon pe ho na mere dair o haram ka ehsaan
Rozan hi jhonpri ka mujh ko sehar numa ho
Phoolon ko aaye jis dam shabnam wuzu karane
Rona mera wuzu ho nala meri dua ho
Is khamoshi mein jaayen itne buland naale
Taaron ke qafile ko meri sada dara ho
Har dardmand dil ko rona mera rula de
Be-hosh jo pade hain shayad unhein jaga de