جواب شکوہ — علامہ اقبال
شاعر
جواب شکوہ
دل سے جو بات نکلتی ہے اثر رکھتی ہے
پر نہیں طاقت پرواز مگر رکھتی ہے
قدسی الاصل ہے رفعت پہ نظر رکھتی ہے
خاک سے اٹھتی ہے گردوں پہ گزر رکھتی ہے
عشق تھا فتنہ گر و سرکش و چالاک مرا
آسماں چیر گیا نالۂ بیباک مرا
پیر گردوں نے کہا سن کے کہیں ہے کوئی
بولے سیارے سر عرش بریں ہے کوئی
چاند کہتا تھا نہیں اہل زمیں ہے کوئی
کہکشاں کہتی تھی پوشیدہ یہیں ہے کوئی
کچھ جو سمجھا مرے شکوے کو تو رضواں سمجھا
مجھ کو جنت سے نکالا ہوا انساں سمجھا
تھی فرشتوں کو بھی حیرت کہ یہ آواز ہے کیا
عرش والوں پہ بھی کھلتا نہیں یہ راز ہے کیا
تا سر عرش بھی انساں کی تگ و تاز ہے کیا
آ گئی خاک کی چٹکی کو بھی پرواز ہے کیا
غافل آداب سے سکان زمیں کیسے ہیں
شوخ و گستاخ یہ پستی کے مکیں کیسے ہیں
اس قدر شوخ کہ اللہ سے بھی برہم ہے
تھا جو مسجود ملائک یہ وہی آدم ہے
عالم کیف ہے دانائے رموز کم ہے
ہاں مگر عجز کے اسرار سے نامحرم ہے
ناز ہے طاقت گفتار پہ انسانوں کو
بات کرنے کا سلیقہ نہیں نادانوں کو
آئی آواز غم انگیز ہے افسانہ ترا
اشک بیتاب سے لبریز ہے پیمانہ ترا
آسماں گیر ہوا نعرۂ مستانہ ترا
کس قدر شوخ زباں ہے دل دیوانہ ترا
شکر شکوے کو کیا حسن ادا سے تو نے
ہم سخن کر دیا بندوں کو خدا سے تو نے
ہم تو مائل بہ کرم ہیں کوئی سائل ہی نہیں
راہ دکھلائیں کسے رہرو منزل ہی نہیں
تربیت عام تو ہے جوہر قابل ہی نہیں
جس سے تعمیر ہو آدم کی یہ وہ گل ہی نہیں
کوئی قابل ہو تو ہم شان کئی دیتے ہیں
ڈھونڈنے والوں کو دنیا بھی نئی دیتے ہیں
ہاتھ بے زور ہیں الحاد سے دل خوگر ہیں
امتی باعث رسوائی پیغمبر ہیں
بت شکن اٹھ گئے باقی جو رہے بت گر ہیں
تھا براہیم پدر اور پسر آزر ہیں
بادہ آشام نئے بادہ نیا خم بھی نئے
حرم کعبہ نیا بت بھی نئے تم بھی نئے
وہ بھی دن تھے کہ یہی مایۂ رعنائی تھا
نازش موسم گل لالۂ صحرائی تھا
جو مسلمان تھا اللہ کا سودائی تھا
کبھی محبوب تمہارا یہی ہرجائی تھا
کسی یکجائی سے اب عہد غلامی کر لو
ملت احمد مرسل کو مقامی کر لو
کس قدر تم پہ گراں صبح کی بیداری ہے
ہم سے کب پیار ہے ہاں نیند تمہیں پیاری ہے
طبع آزاد پہ قید رمضاں بھاری ہے
تمہیں کہہ دو یہی آئین وفاداری ہے
قوم مذہب سے ہے مذہب جو نہیں تم بھی نہیں
جذب باہم جو نہیں محفل انجم بھی نہیں
جن کو آتا نہیں دنیا میں کوئی فن تم ہو
نہیں جس قوم کو پروائے نشیمن تم ہو
بجلیاں جس میں ہوں آسودہ وہ خرمن تم ہو
بیچ کھاتے ہیں جو اسلاف کے مدفن تم ہو
ہو نکو نام جو قبروں کی تجارت کر کے
کیا نہ بیچوگے جو مل جائیں صنم پتھر کے
صفحۂ دہر سے باطل کو مٹایا کس نے
نوع انساں کو غلامی سے چھڑایا کس نے
میرے کعبے کو جبینوں سے بسایا کس نے
میرے قرآن کو سینوں سے لگایا کس نے
تھے تو آبا وہ تمہارے ہی مگر تم کیا ہو
ہاتھ پر ہاتھ دھرے منتظر فردا ہو
کیا کہا بہر مسلماں ہے فقط وعدۂ حور
شکوہ بے جا بھی کرے کوئی تو لازم ہے شعور
عدل ہے فاطر ہستی کا ازل سے دستور
مسلم آئیں ہوا کافر تو ملے حور و قصور
تم میں حوروں کا کوئی چاہنے والا ہی نہیں
جلوۂ طور تو موجود ہے موسیٰ ہی نہیں
منفعت ایک ہے اس قوم کا نقصان بھی ایک
ایک ہی سب کا نبی دین بھی ایمان بھی ایک
حرم پاک بھی اللہ بھی قرآن بھی ایک
کچھ بڑی بات تھی ہوتے جو مسلمان بھی ایک
فرقہ بندی ہے کہیں اور کہیں ذاتیں ہیں
کیا زمانے میں پنپنے کی یہی باتیں ہیں
کون ہے تارک آئین رسول مختار
مصلحت وقت کی ہے کس کے عمل کا معیار
کس کی آنکھوں میں سمایا ہے شعار اغیار
ہو گئی کس کی نگہ طرز سلف سے بے زار
قلب میں سوز نہیں روح میں احساس نہیں
کچھ بھی پیغام محمد کا تمہیں پاس نہیں
جا کے ہوتے ہیں مساجد میں صف آرا تو غریب
زحمت روزہ جو کرتے ہیں گوارا تو غریب
نام لیتا ہے اگر کوئی ہمارا تو غریب
پردہ رکھتا ہے اگر کوئی تمہارا تو غریب
امرا نشۂ دولت میں ہیں غافل ہم سے
زندہ ہے ملت بیضا غربا کے دم سے
واعظ قوم کی وہ پختہ خیالی نہ رہی
برق طبعی نہ رہی شعلہ مقالی نہ رہی
رہ گئی رسم اذاں روح بلالی نہ رہی
فلسفہ رہ گیا تلقین غزالی نہ رہی
مسجدیں مرثیہ خواں ہیں کہ نمازی نہ رہے
یعنی وہ صاحب اوصاف حجازی نہ رہے
شور ہے ہو گئے دنیا سے مسلماں نابود
ہم یہ کہتے ہیں کہ تھے بھی کہیں مسلم موجود
وضع میں تم ہو نصاریٰ تو تمدن میں ہنود
یہ مسلماں ہیں جنہیں دیکھ کے شرمائیں یہود
یوں تو سید بھی ہو مرزا بھی ہو افغان بھی ہو
تم سبھی کچھ ہو بتاؤ تو مسلمان بھی ہو
دم تقریر تھی مسلم کی صداقت بیباک
عدل اس کا تھا قوی لوث مراعات سے پاک
شجر فطرت مسلم تھا حیا سے نمناک
تھا شجاعت میں وہ اک ہستی فوق الادراک
خود گدازی نم کیفیت صہبایش بود
خالی از خویش شدن صورت مینا یش بود
ہر مسلماں رگ باطل کے لیے نشتر تھا
اس کے آئینۂ ہستی میں عمل جوہر تھا
جو بھروسا تھا اسے قوت بازو پر تھا
ہے تمہیں موت کا ڈر اس کو خدا کا ڈر تھا
باپ کا علم نہ بیٹے کو اگر ازبر ہو
پھر پسر قابل میراث پدر کیونکر ہو
ہر کوئی مست مئے ذوق تن آسانی ہے
تم مسلماں ہو یہ انداز مسلمانی ہے
حیدری فقر ہے نے دولت عثمانی ہے
تم کو اسلاف سے کیا نسبت روحانی ہے
وہ زمانے میں معزز تھے مسلماں ہو کر
اور تم خوار ہوئے تارک قرآں ہو کر
تم ہو آپس میں غضب ناک وہ آپس میں رحیم
تم خطا کار و خطا بیں وہ خطا پوش و کریم
چاہتے سب ہیں کہ ہوں اوج ثریا پہ مقیم
پہلے ویسا کوئی پیدا تو کرے قلب سلیم
تخت فغفور بھی ان کا تھا سریر کے بھی
یوں ہی باتیں ہیں کہ تم میں وہ حمیت ہے بھی
خودکشی شیوہ تمہارا وہ غیور و خوددار
تم اخوت سے گریزاں وہ اخوت پہ نثار
تم ہو گفتار سراپا وہ سراپا کردار
تم ترستے ہو کلی کو وہ گلستاں بکنار
اب تلک یاد ہے قوموں کو حکایت ان کی
نقش ہے صفحۂ ہستی پہ صداقت ان کی
مثل انجم افق قوم پہ روشن بھی ہوئے
بت ہندی کی محبت میں برہمن بھی ہوئے
شوق پرواز میں مہجور نشیمن بھی ہوئے
بے عمل تھے ہی جواں دین سے بدظن بھی ہوئے
ان کو تہذیب نے ہر بند سے آزاد کیا
لا کے کعبے سے صنم خانے میں آباد کیا
قیس زحمت کش تنہائی صحرا نہ رہے
شہر کی کھائے ہوا بادیہ پیما نہ رہے
وہ تو دیوانہ ہے بستی میں رہے یا نہ رہے
یہ ضروری ہے حجاب رخ لیلا نہ رہے
گلۂ جور نہ ہو شکوۂ بیداد نہ ہو
عشق آزاد ہے کیوں حسن بھی آزاد نہ ہو
عہد نو برق ہے آتش زن ہر خرمن ہے
ایمن اس سے کوئی صحرا نہ کوئی گلشن ہے
اس نئی آگ کا اقوام کہن ایندھن ہے
ملت ختم رسل شعلہ بہ پیراہن ہے
آج بھی ہو جو براہیم کا ایماں پیدا
آگ کر سکتی ہے انداز گلستاں پیدا
دیکھ کر رنگ چمن ہو نہ پریشاں مالی
کوکب غنچہ سے شاخیں ہیں چمکنے والی
خس و خاشاک سے ہوتا ہے گلستاں خالی
گل بر انداز ہے خون شہدا کی لالی
رنگ گردوں کا ذرا دیکھ تو عنابی ہے
یہ نکلتے ہوئے سورج کی افق تابی ہے
امتیں گلشن ہستی میں ثمر چیدہ بھی ہیں
اور محروم ثمر بھی ہیں خزاں دیدہ بھی ہیں
سیکڑوں نخل ہیں کاہیدہ بھی بالیدہ بھی ہیں
سیکڑوں بطن چمن میں ابھی پوشیدہ بھی ہیں
نخل اسلام نمونہ ہے برومندی کا
پھل ہے یہ سیکڑوں صدیوں کی چمن بندی کا
پاک ہے گرد وطن سے سر داماں تیرا
تو وہ یوسف ہے کہ ہر مصر ہے کنعاں تیرا
قافلہ ہو نہ سکے گا کبھی ویراں تیرا
غیر یک بانگ درا کچھ نہیں ساماں تیرا
نخل شمع استی و در شعلہ دو ریشۂ تو
عاقبت سوز بود سایۂ اندیشۂ تو
تو نہ مٹ جائے گا ایران کے مٹ جانے سے
نشۂ مے کو تعلق نہیں پیمانے سے
ہے عیاں یورش تاتار کے افسانے سے
پاسباں مل گئے کعبے کو صنم خانے سے
کشتئ حق کا زمانے میں سہارا تو ہے
عصر نو رات ہے دھندلا سا ستارا تو ہے
ہے جو ہنگامہ بپا یورش بلغاری کا
غافلوں کے لیے پیغام ہے بیداری کا
تو سمجھتا ہے یہ ساماں ہے دل آزاری کا
امتحاں ہے ترے ایثار کا خودداری کا
کیوں ہراساں ہے صہیل فرس اعدا سے
نور حق بجھ نہ سکے گا نفس اعدا سے
چشم اقوام سے مخفی ہے حقیقت تیری
ہے ابھی محفل ہستی کو ضرورت تیری
زندہ رکھتی ہے زمانے کو حرارت تیری
کوکب قسمت امکاں ہے خلافت تیری
وقت فرصت ہے کہاں کام ابھی باقی ہے
نور توحید کا اتمام ابھی باقی ہے
مثل بو قید ہے غنچے میں پریشاں ہو جا
رخت بر دوش ہوائے چمنستاں ہو جا
ہے تنک مایہ تو ذرے سے بیاباں ہو جا
نغمۂ موج ہے ہنگامۂ طوفاں ہو جا
قوت عشق سے ہر پست کو بالا کر دے
دہر میں اسم محمد سے اجالا کر دے
ہو نہ یہ پھول تو بلبل کا ترنم بھی نہ ہو
چمن دہر میں کلیوں کا تبسم بھی نہ ہو
یہ نہ ساقی ہو تو پھر مے بھی نہ ہو خم بھی نہ ہو
بزم توحید بھی دنیا میں نہ ہو تم بھی نہ ہو
خیمہ افلاک کا استادہ اسی نام سے ہے
نبض ہستی تپش آمادہ اسی نام سے ہے
دشت میں دامن کہسار میں میدان میں ہے
بحر میں موج کی آغوش میں طوفان میں ہے
چین کے شہر مراقش کے بیابان میں ہے
اور پوشیدہ مسلمان کے ایمان میں ہے
چشم اقوام یہ نظارہ ابد تک دیکھے
رفعت شان رفعنا لک ذکرک دیکھے
مردم چشم زمیں یعنی وہ کالی دنیا
وہ تمہارے شہدا پالنے والی دنیا
گرمی مہر کی پروردہ ہلالی دنیا
عشق والے جسے کہتے ہیں بلالی دنیا
تپش اندوز ہے اس نام سے پارے کی طرح
غوطہ زن نور میں ہے آنکھ کے تارے کی طرح
عقل ہے تیری سپر عشق ہے شمشیر تری
مرے درویش خلافت ہے جہانگیر تری
ما سوا اللہ کے لیے آگ ہے تکبیر تری
تو مسلماں ہو تو تقدیر ہے تدبیر تری
کی محمد سے وفا تو نے تو ہم تیرے ہیں
یہ جہاں چیز ہے کیا لوح و قلم تیرے ہیں
Jawab-e-Shikwa
Dil se jo baat nikalti hai asar rakhti hai
Par nahin taqat-e-parwaaz magar rakhti hai
Qudsi-ul-asl hai rif'at pe nazar rakhti hai
Khaak se uThti hai gardon pe guzar rakhti hai
Ishq tha fitna-gar-o-sarkash-o-chaalaak mera
Aasmaan cheer gaya naala-e-be-baak mera
Peer-e-gardoon ne kaha sun ke kahi hai koi
Bole siyare sar-e-arsh-e-bareen hai koi
Chand kehta tha nahin ehl-e-zameen hai koi
Kahkashaan kehti thi posheeda yahin hai koi
Kuch jo samjha mere shikwe ko toh Rizwan samjha
Mujh ko jannat se nikala hua insaan samjha
Thi farishton ko bhi hairat ke yeh awaaz hai kya
Arsh walon pe bhi khulta nahin yeh raaz hai kya
Ta sar-e-arsh bhi insaan ki tag-o-taaz hai kya
Aa gayi khaak ki chuTki ko bhi parwaaz hai kya
Ghafil aadaab se sakanaan-e-zameen kaise hain
Shokh-o-gustaakh yeh pasti ke makeen kaise hain
Is qadar shokh ke Allah se bhi barham hai
Tha jo masjood-e-malaik yeh wohi Adam hai
Aalam-e-kaif hai daana-e-ramooz-e-kam hai
Haan magar ajz ke asraar se na-mahram hai
Naaz hai taqat-e-guftaar pe insaanon ko
Baat karne ka saleeqa nahin naadaanon ko
Ayee awaaz gham-angez hai afsaana tera
Ashk-e-betaab se labraiz hai paimaana tera
Aasmaan-geer hua na'ra-e-mastana tera
Kis qadar shokh zabaan hai dil-e-deewana tera
Shukr shikwe ko kiya husn-e-ada se tu ne
Ham sukhan kar diya bandon ko Khuda se tu ne
Ham toh maayal ba-karam hain koi saail hi nahin
Raah dikhlaein kise rahro-e-manzil hi nahin
Tarbiyat-e-aam toh hai jauhar-e-qaabil hi nahin
Jis se ta'meer ho Adam ki yeh woh gul hi nahin
Koi qaabil ho toh hum shaan-e-kai dete hain
DhoonDne walon ko dunya bhi nayi dete hain
Haath be-zor hain ilhaad se dil khogar hain
Ummati ba'is-e-ruswaayi-e-paighambar hain
But shikan uTh gaye baaqi jo rahe but-gar hain
Tha Braheem pidar aur pisar Aazar hain
Baada aasham naye baada naya khum bhi naye
Haram-e-Ka'aba naya but bhi naye tum bhi naye
Woh bhi din the ke yehi maaya-e-ra'anaayi tha
Nazish-e-mausam-e-gul laala-e-sahraayi tha
Jo musalmaan tha Allah ka saudaayi tha
Kabhi mehboob tumhara yehi harjaayi tha
Kisi yak-jaayi se ab ehd-e-ghulami kar lo
Millat-e-Ahmad-e-mursil ko muqami kar lo
Kis qadar tum pe giraan subh ki bedaari hai
Ham se kab pyaar hai haan neend tumhein pyaari hai
Tab'a-e-azad pe qaid-e-Ramzaan bhaari hai
Tumein keh do yehi aayeen-e-wafaadaari hai
Qaum mazhab se hai mazhab jo nahin tum bhi nahin
Jazb-e-baaham jo nahin mahfil-e-anjum bhi nahin
Jin ko aata nahin dunya mein koi fan tum ho
Nahin jis qaum ko parwaa-e-nasheman tum ho
Bijliyan jis mein hon asooda woh khirman tum ho
Bech khaate hain jo aslaaf ke madfan tum ho
Hon niko naam jo qabron ki tijaarat kar ke
Kya na bechoge jo mil jaayen sanam patthar ke
Safha-e-dehr se baatil ko miTaya kis ne
Nau'-e-insaan ko ghulami se chhuRaya kis ne
Mere Ka'aba ko jabeenon se basaya kis ne
Mere Qur'an ko seenon se lagaya kis ne
The toh aaba woh tumhare hi magar tum kya ho
Haath par haath dhare muntazir-e-fardaa ho
Kya kaha bahr-e-musalmaan hai faqat wa'da-e-hoor
Shikwa-e-be-ja bhi kare koi toh laazim hai shaoor
Adl hai faatir-e-hasti ka azal se dastoor
Musalim aayeen hua kaafir toh mile hoor-o-qasoor
Tum mein hooron ka koi chahne wala hi nahin
Jalwa-e-Toor toh maujood hai Moosa hi nahin
Manfa'at ek hai is qaum ka nuqsaan bhi ek
Ek hi sab ka Nabi deen bhi imaan bhi ek
Haram-e-Paak bhi Allah bhi Qur'an bhi ek
Kuch baRi baat thi hote jo musalmaan bhi ek
Firqa bandi hai kahin aur kahin zaate hain
Kya zamane mein panapne ki yehi baatein hain
Kaun hai taarik-e-aayeen-e-Rasool-e-Mukhtaar
Maslehat waqt ki hai kis ke amal ka miyaar
Kis ki aankhon mein samaya hai sha'aar-e-aghiyaar
Ho gayi kis ki nigah tarz-e-salaf se bezaar
Qalb mein soz nahin rooh mein ehsaas nahin
Kuch bhi paighaam-e-Muhammad ka tumhein paas nahin
Ja ke hote hain masaajid mein saf aara toh ghareeb
Zahmat-e-roza jo karte hain gawara toh ghareeb
Naam leta hai agar koi humara toh ghareeb
Parda rakhta hai agar koi tumhara toh ghareeb
Umra nasha-e-daulat mein hain ghaafil hum se
Zinda hai millat-e-baiza ghuraaba ke dam se
Waa'iz-e-qaum ki woh pokhta-khayaali na rahi
Barq-e-tab'ii na rahi shola-e-muqaali na rahi
Reh gayi rasm-e-azaan rooh-e-Bilaali na rahi
Falsafa reh gaya talqeen-e-Ghazali na rahi
Masaajidein marsiya khwan hain ke namazi na rahe
Ya'ni woh sahib-e-ausaf-e-Hijazi na rahe
Shor hai ho gaye dunya se musalmaan nabood
Hum yeh kehte hain ke the bhi kahin muslim maujood
Waz'a mein tum ho nasara toh tamaddun mein hunood
Yeh musalmaan hain jinhein dekh ke sharmaayen Yahood
Yoon toh Sayyad bhi ho Mirza bhi ho Afghan bhi ho
Tum sabhi kuch ho batao toh musalmaan bhi ho
Dam-e-taqreer thi Muslim ki sadaaqat be-baak
Adl us ka tha qawi loos-e-mura'aat se paak
Shajar-e-fitrat-e-Muslim tha haya se nam-naak
Tha shujaa'at mein woh ek hasti-e-fauq-ul-idraak
Khudd-gudazi num-e-kaifiyat-e-sehba'ish bood
Khaali az khwesh shudan surat-e-meena'ish bood
Har musalmaan rag-e-baatil ke liye nishtar tha
Us ke aaiina-e-hasti mein amal jauhar tha
Jo bharosa tha usey quwwat-e-baazu par tha
Hai tumhein maut ka dar us ko Khuda ka dar tha
Baap ka ilm na beTey ko agar azbar ho
Phir pisar qaabil-e-meeraas-e-pidar kyun kar ho
Har koi mast-e-may-e-zauq-e-tan aasaani hai
Tum musalmaan ho yeh andaaz-e-musalmaani hai
Haidari faqr hai ne daulat-e-Uthmaani hai
Tum ko aslaaf se kya nisbat-e-roohaani hai
Woh zamane mein mu'azzaz the musalmaan ho kar
Aur tum khwar hue taarik-e-Qur'an ho kar
Tum ho aapas mein ghazab naak woh aapas mein Raheem
Tum khata kaar-o-khata been woh khata posh-o-Kareem
Chahte sab hi hain ke hon auj-e-surayya pe muqeem
Pehle waisa koi paida toh kare qalb-e-saleem
Takht-e-Faghfoor bhi un ka tha sareer-e-kai bhi
Yoon hi baatein hain ke tum mein woh hamiyat hai bhi
Khud-kushi shewa tumhara woh ghayoor-o-khuddaar
Tum ukhuwwat se gurezaan woh ukhuwwat pe nisaar
Tum ho guftaar sarapa woh sarapa kirdaar
Tum taraste ho kali ko woh gulistaan ba-kinaar
Ab talak yaad hai qaumon ko hikayat un ki
Naqsh hai safha-e-hasti pe sadaaqat un ki
Misl-e-anjum ufuq-e-qaum pe roshan bhi hue
But-e-Hindi ki mohabbat mein barahman bhi hue
Shauq-e-parwaaz mein mahjoor-e-nasheman bhi hue
Be-amal the hi jawaan deen se bad-zan bhi hue
In ko tehzeeb ne har band se aazad kiya
La ke Ka'aba se sanam-khaane mein aabaad kiya
Qais zahmat-kash-e-tanhaayi-e-sahra na rahe
Shehr ki khaye hawa baadiyah paima na rahe
Woh toh deewana hai basti mein rahe ya na rahe
Yeh zaroori hai hijaab-e-rukh-e-Laila na rahe
Gila-e-jor na ho shikwa-e-bedaad na ho
Ishq aazad hai kyun husn bhi aazad na ho
Ahd-e-nau barq hai aatish-zan har khirman hai
Aimen is se koi sahra na koi gulshan hai
Is nayi aag ka aqwaam-e-kuhan eendhan hai
Millat-e-khatm-e-rusul shola ba-pairaahan hai
Aaj bhi ho jo Braheem ka imaan paida
Aag kar sakti hai andaaz-e-gulistaan paida
Dekh kar rang-e-chaman ho na pareshaan maali
Kaukab-e-ghuncha se shaakhein hain chamakne waali
Khas-o-khaashaak se hota hai gulistaan khaali
Gul bar andaaz hai khoon-e-shohada ki laali
Rang-e-gardoon ka zara dekh toh annaabi hai
Yeh nikalte hue suraj ki ufuq-taabi hai
Ummatain gulshan-e-hasti mein samar cheeda bhi hain
Aur mahroom-e-samar bhi hain khizaan deeda bhi hain
Saiy-kaRon nakhhl hain kaheeda bhi baaleeda bhi hain
Saiy-kaRon baTn-e-chaman mein abhi posheeda bhi hain
Nakhhl-e-Islam namoona hai baromandi ka
Phal hai yeh saiy-kaRon sadiyon ki chaman bandi ka
Paak hai gard-e-watan se sar-e-daamaan tera
Tu woh Yusuf hai ke har Misr hai Kanaan tera
Qaafila ho na sakega kabhi veeraan tera
Ghayer yak baang-e-dara kuch nahin saamaan tera
Nakhhl-e-shama asti-o-dar shola do reesha tu
AQibat-e-soz bood saaya andeesha tu
Tu na miT jaye ga Iran ke miT jaane se
Nasha-e-may ko ta'alluq nahin paimaane se
Hai ayaan yauraish-e-Tataar ke afsaane se
Paasbaan mil gaye Ka'aba ko sanam-khaane se
Kashti-e-Haq ka zamane mein sahara tu hai
Asr-e-nau raat hai dhundla sa sitara tu hai
Hai jo hangaama bapa yauraish-e-Bulghaari ka
Ghafilon ke liye paighaam hai bedaari ka
Tu samajhta hai yeh saamaan hai dil-aazaari ka
Imtihan hai tere eesaar ka khuddaari ka
Kyun haraasaan hai saheel-e-faras-e-a'ada se
Noor-e-Haq bujh na sakega nafas-e-a'ada se
Chashm-e-aqwaam se makhfi hai haqeeqat teri
Hai abhi mahfil-e-hasti ko zaroorat teri
Zinda rakhti hai zamane ko haraarat teri
Kaukab-e-qismat-e-imkaan hai khilafat teri
Waqt-e-fursat hai kahan kaam abhi baaqi hai
Noor-e-tauheed ka itmaam abhi baaqi hai
Misl-e-boo qaid hai ghunche mein pareshaan ho ja
Rakht bar dosh hawa-e-chamanistaan ho ja
Hai tanak maaya tu zarre se biyabaan ho ja
Naghma-e-mauj hai hangaama-e-toofan ho ja
Quwwat-e-ishq se har past ko bala kar de
Dehr mein Ism-e-Muhammad se ujaala kar de
Ho na yeh phool toh bulbul ka tarannum bhi na ho
Chaman-e-dehr mein kaliyon ka tabassum bhi na ho
Yeh na saaqi ho toh phir may bhi na ho khum bhi na ho
Bazm-e-tauheed bhi dunya mein na ho tum bhi na ho
Khema-e-aflaak ka ustaada isi naam se hai
Nabz-e-hasti tapish-e-aamada isi naam se hai
Dasht mein daaman-e-kohsaar mein maidaan mein hai
Bahr mein mauj ki aaghosh mein toofan mein hai
Cheen ke shehr-e-Murrakesh ke biyabaan mein hai
Aur posheeda musalmaan ke imaan mein hai
Chashm-e-aqwaam yeh nazaara abad tak dekhe
Rif'at-e-shaan-e-Rafa'ana laka zikrak dekhe
Mardum-e-chashm-e-zameen ya'ni woh kaali dunya
Woh tumhare shohada paalne waali dunya
Garmi-e-mehr ki parwarda Hilaali dunya
Ishq wale jise kehte hain Bilaali dunya
Tapish-andoz hai is naam se paare ki tarah
Gota-zan noor mein hai aankh ke taare ki tarah
Aql hai teri sipar ishq hai shamshir teri
Mere darwesh khilafat hai jahangeer teri
Ma siwa Allah ke liye aag hai takbeer teri
Tu musalmaan ho toh taqdeer hai tadbeer teri
Ki Muhammad se wafa tu ne toh hum tere hain
Yeh jahaan cheez hai kya Loh-o-Qalam tere hain
شاعر کے بارے میں
علامہ ڈاکٹر محمد اقبال 9 نومبر 1877 کو سیالکوٹ میں پیدا ہوئے۔ ان کی ابتدائی تعلیم بھی انہی کے شہر میں ہوئی اور بعد میں انہوں نے گورنمنٹ کالج لاہور ...
مکمل تعارف پڑھیں