ہم نے تری خاطر سے دل زار بھی چھوڑا — بہادرشاہ ظفر
شاعر
ہم نے تری خاطر سے دل زار بھی چھوڑا
ہم نے تری خاطر سے دل زار بھی چھوڑا
تو بھی نہ ہوا یار اور اک یار بھی چھوڑا
کیا ہوگا رفوگر سے رفو میرا گریبان
اے دست جنوں تو نے نہیں تار بھی چھوڑا
دیں دے کے گیا کفر کے بھی کام سے عاشق
تسبیح کے ساتھ اس نے تو زنار بھی چھوڑا
گوشہ میں تری چشم سیہ مست کے دل نے
کی جب سے جگہ خانۂ خمار بھی چھوڑا
اس سے ہے غریبوں کو تسلی کہ اجل نے
مفلس کو جو مارا تو نہ زردار بھی چھوڑا
ٹیڑھے نہ ہو ہم سے رکھو اخلاص تو سیدھا
تم پیار سے رکتے ہو تو لو پیار بھی چھوڑا
کیا چھوڑیں اسیران محبت کو وہ جس نے
صدقے میں نہ اک مرغ گرفتار بھی چھوڑا
پہنچی مری رسوائی کی کیونکر خبر اس کو
اس شوخ نے تو دیکھنا اخبار بھی چھوڑا
کرتا تھا جو یاں آنے کا جھوٹا کبھی اقرار
مدت سے ظفرؔ اس نے وہ اقرار بھی چھوڑا
Hum ne teri khatir se dil-e-zaar bhi chhora
Hum ne teri khatir se dil-e-zaar bhi chhora
Tu bhi na hua yaar aur ek yaar bhi chhora
Kya hoga rafoogar se rafoo mera garebaan
Aye dast-e-junoon tu ne nahin taar bhi chhora
Deen de ke gaya kufr ke bhi kaam se ashiq
Tasbeeh ke saath us ne to zunnar bhi chhora
Gosha mein teri chashm-e-siyah-mast ke dil ne
Ki jab se jagah khana-e-khumar bhi chhora
Is se hai gharibon ko tasalli ke ajal ne
Muflis ko jo mara to na zar-daar bhi chhora
Tedhe na ho hum se rakho ikhlas to seedha
Tum pyar se rakhte ho to lo pyar bhi chhora
Kya chhoden aseeran-e-mohabbat ko wo jis ne
Sadqe mein na ek murgh-e-giraftar bhi chhora
Pahunchi meri ruswai ki kyun kar khabar us ko
Is shokh ne to dekhna akhbar bhi chhora
Karta tha jo yaan aane ka jhoota kabhi iqrar
Muddat se Zafar! us ne wo iqrar bhi chhora
شاعر کے بارے میں
بہادر شاہ ظفر برصغیر کے آخری مغل فرمانروا اور اردو ادب کی ایک المناک مگر درخشاں شخصیت تھے۔ ان کا اصل نام ابو ظفر سراج الدین محمد تھا اور وہ 24 اکتو...
مکمل تعارف پڑھیں