نہ دو دشنام ہم کو اتنی بد خوئی سے کیا حاصل — بہادرشاہ ظفر
شاعر
نہ دو دشنام ہم کو اتنی بد خوئی سے کیا حاصل
نہ دو دشنام ہم کو اتنی بد خوئی سے کیا حاصل
تمہیں دینا ہی ہوگا بوسہ خم روئی سے کیا حاصل
دل آزاری نے تیری کر دیا بالکل مجھے بیدل
نہ کر اب میری دل جوئی کہ دل جوئی سے کیا حاصل
نہ جب تک چاک ہو دل پھانس کب دل کی نکلتی ہے
جہاں ہو کام خنجر کا وہاں سوئی سے کیا حاصل
برائی یا بھلائی گو ہے اپنے واسطے لیکن
کسی کو کیوں کہیں ہم بد کہ بد گوئی سے کیا حاصل
نہ کر فکر خضاب اے شیخ تو پیری میں جانے دے
جواں ہونا نہیں ممکن سیہ روئی سے کیا حاصل
چڑھائے آستیں خنجر بکف وہ یوں جو پھرتا ہے
اسے کیا جانے ہے اس عربدہ جوئی سے کیا حاصل
عبث پنبہ نہ رکھ داغ دل سوزاں پہ تو میرے
کہ انگارے پہ ہوگا چارہ گر روئی سے کیا حاصل
شمیم زلف ہو اس کی تو ہو فرحت مرے دل کو
صبا ہووے گا مشک چیں کی خوشبوئی سے کیا حاصل
نہ ہووے جب تلک انساں کو دل سے میل یک جانب
ظفرؔ لوگوں کے دکھلانے کو یکسوئی سے کیا حاصل
Na do dushnām ham ko itnī bad-khū'ī se kyā hāsil
Na do dushnām ham ko itnī bad-khū'ī se kyā hāsil
Tumhīñ denā hī hogā bosa-e-kham-rū'ī se kyā hāsil
Dil-āzārī ne terī kar diyā bilkul mujhe be-dil
Na kar ab merī dil-jū'ī ke dil-jū'ī se kyā hāsil
Na jab tak chāk ho dil phāñs kab dil kī nikaltī hai
Jahāñ ho kām khanjar kā vahāñ su'ī se kyā hāsil
Burā'ī yā bhalā'ī go hai apne vāste lekin
Kisī ko kyūñ kahīñ ham bad ke bad-go'ī se kyā hāsil
Na kar fikr-e-khizāb ai shaikh tū pīrī mein jaane de
Javāñ honā nahīñ mumkin siyah-rū'ī se kyā hāsil
Chaṛhā'e āstīñ khanjar ba-kaf wo yūñ jo phirtā hai
Use kyā jaane hai is arbada-jū'ī se kyā hāsil
Abas panba na rakh dāgh-e-dil-e-sozāñ pe tū mere
Ke añgāre pe hogā chāra-gar rū'ī se kyā hāsil
Shamīm-e-zulf ho us kī to ho farhat mere dil ko
Sabā hovegā mushk-e-chīn kī khushbū'ī se kyā hāsil
Na hove jab talak insāñ ko dil se mail yak-jānib
Zafarؔ logoñ ke dikhlāne ko yak-sū'ī se kyā hāsil
شاعر کے بارے میں
بہادر شاہ ظفر برصغیر کے آخری مغل فرمانروا اور اردو ادب کی ایک المناک مگر درخشاں شخصیت تھے۔ ان کا اصل نام ابو ظفر سراج الدین محمد تھا اور وہ 24 اکتو...
مکمل تعارف پڑھیں