رخ جو زیر سنبل پر پیچ و تاب آ جائے گا — بہادرشاہ ظفر
شاعر
رخ جو زیر سنبل پر پیچ و تاب آ جائے گا
رخ جو زیر سنبل پر پیچ و تاب آ جائے گا
پھر کے برج سنبلہ میں آفتاب آ جائے گا
تیرا احساں ہوگا قاصد گر شتاب آ جائے گا
صبر مجھ کو دیکھ کر خط کا جواب آ جائے گا
ہو نہ بیتاب اتنا گر اس کا عتاب آ جائے گا
تو غضب میں اے دل خانہ خراب آ جائے گا
اس قدر رونا نہیں بہتر بس اب اشکوں کو روک
ورنہ طوفاں دیکھ اے چشم پر آب آ جائے گا
پیش ہووے گا اگر تیرے گناہوں کا حساب
تنگ ظالم عرصۂ روز حساب آ جائے گا
دیکھ کر دست ستم میں تیری تیغ آب دار
میرے ہر زخم جگر کے منہ میں آب آ جائے گا
اپنی چشم مست کی گردش نہ اے ساقی دکھا
دیکھ چکر میں ابھی جام شراب آ جائے گا
خوب ہوگا ہاں جو سینہ سے نکل جائے گا تو
چین مجھ کو اے دل پر اضطراب آ جائے گا
اے ظفرؔ اٹھ جائے گا جب پردہ شرم و حجاب
سامنے وہ یار میرے بے حجاب آ جائے گا
Rukh jo zer-e-sumbul par pech o taab aa jayega
Rukh jo zer-e-sumbul par pech o taab aa jayega
Phir ke burj-e-sumbulah mein aaftab aa jayega
Tera ehsan hoga qaasid gar shatab aa jayega
Sabr mujh ko dekh kar khat ka jawab aa jayega
Ho na betaab itna gar is ka itab aa jayega
Tu ghazab mein aye dil-e-khana-kharab aa jayega
Is qadar rona nahin behtar bas ab ashkon ko rok
Warna toofan dekh aye chashm-e-pur-aab aa jayega
Pesh hovega agar tere gunahon ka hisab
Tang zalim arsa-e-roz-e-hisab aa jayega
Dekh kar dast-e-sitam mein teri tegh-e-aab-dar
Mere har zakhm-e-jigar ke munh mein aab aa jayega
Apni chashm-e-mast ki gardish na aye saqi dikha
Dekh chakkar mein abhi jaam-e-sharab aa jayega
Khoob hoga han jo seena se nikal jayega tu
Chain mujh ko aye dil-e-pur-iztirab aa jayega
Aye Zafar! uth jayega jab parda-e-sharm o hijab
Samne woh yaar mere be-hijab aa jayega
شاعر کے بارے میں
بہادر شاہ ظفر برصغیر کے آخری مغل فرمانروا اور اردو ادب کی ایک المناک مگر درخشاں شخصیت تھے۔ ان کا اصل نام ابو ظفر سراج الدین محمد تھا اور وہ 24 اکتو...
مکمل تعارف پڑھیں