ان کا یا اپنا تماشا دیکھو — باقی صدیقی
شاعر
ان کا یا اپنا تماشا دیکھو
ان کا یا اپنا تماشا دیکھو
جو دکھاتا ہے زمانہ دیکھو
وقت کے پاس ہیں کچھ تصویریں
کوئی ڈوبا ہے کہ ابھرا دیکھو
رنگ ساحل کا نکھر آئے گا
دو گھڑی جانب دریا دیکھو
تلملا اٹھا گھنا سناٹا
پھر کوئی نیند سے چونکا دیکھو
ہم سفر غیر ہوئے جاتے ہیں
فاصلہ رہ گیا کتنا دیکھو
برف ہو جاتا ہے صدیوں کا لہو
ایک ٹھہرا ہوا لمحہ دیکھو
رنگ اڑتے ہیں تبسم کی طرح
آئنہ خانوں کا دعویٰ دیکھو
دل کی بگڑی ہوئی صورت ہے یہاں
اب کوئی اور خرابہ دیکھو
یا کسی پردے میں گم ہو جاؤ
یا اٹھا کر کوئی پردا دیکھو
دوستی خون جگر چاہتی ہے
کام مشکل ہے تو رستہ دیکھو
سادہ کاغذ کی طرح دل چپ ہے
حاصل رنگ تمنا دیکھو
یہی تسکین کی صورت ہے تو پھر
چار دن غم کو بھی اپنا دیکھو
غم گساروں کا سہارا کب تک
خود پہ بھی کر کے بھروسا دیکھو
اپنی نیت پہ نہ جاؤ باقیؔ
رخ زمانے کی ہوا کا دیکھو
In ka ya apna tamasha dekho
In ka ya apna tamasha dekho
Jo dikhata hai zamana dekho
Waqt ke paas hain kuch tasveerein
Koi dooba hai ke ubhra dekho
Rang sahil ka nikhar aayega
Do ghadi janib-e-darya dekho
Tilmila utha ghana sannata
Phir koi neend se chonka dekho
Hum safar ghair hue jaate hain
Fasla rah gaya kitna dekho
Barf ho jata hai sadiyon ka lahu
Ek thehra hua lamha dekho
Rang udte hain tabassum ki tarah
Aaina-khanon ka daava dekho
Dil ki bigdi hui soorat hai yahan
Ab koi aur kharabah dekho
Ya kisi parde mein gum ho jao
Ya utha kar koi parda dekho
Dosti khoon-e-jigar chahti hai
Kaam mushkil hai to rasta dekho
Sada kaghaz ki tarah dil chup hai
Hasil rang-e-tamanna dekho
Yahi taskeen ki soorat hai to phir
Char din gham ko bhi apna dekho
Gham gusaron ka sahara kab tak
Khud pe bhi kar ke bharosa dekho
Apni niyat pe na jao Baqiؔ
Rukh zamane ki hawa ka dekho
شاعر کے بارے میں
ِباقی صدیقی اردو اور پوٹھوہاری ادب کے اُن ممتاز شاعروں میں شمار ہوتے ہیں جنہوں نے سادگی، خلوص اور انسانی احساسات کو اپنی شاعری کا محور بنایا۔ ان کا...
مکمل تعارف پڑھیں