چادر اور چار دیواری
حضور میں اس سیاہ چادر کا کیا کروں گی یہ آپ کیوں مجھ کو بخشتے ہیں بصد عنایت نہ سوگ میں ہوں کہ اس کو اوڑھوں غم و الم خلق کو دکھاؤں نہ روگ ہوں میں کہ اس کی تاریکیوں میں خفت سے ڈوب جاؤں نہ میں گناہ گار ہوں نہ مجرم کہ اس سیاہی کی مہر اپنی جبیں پہ ہر حال میں لگاؤں اگر نہ گستاخ مجھ کو سمجھیں اگر میں جاں کی امان پاؤں تو دست بستہ کروں گزارش کہ بندہ پرور حضور کے حجرۂ معطر میں ایک لاشہ پڑا ہوا ہے نہ جانے کب کا گلا سڑا ہے یہ آپ سے رحم چاہتا ہے حضور اتنا کرم تو کیجے سیاہ چادر مجھے نہ دیجئے سیاہ چادر سے اپنے حجرے کی بے کفن لاش ڈھانپ دیجئے کہ اس سے پھوٹی ہے جو عفونت وہ کوچے کوچے میں ہانپتی ہے وہ سر پٹکتی ہے چوکھٹوں پر برہنگی تن کی ڈھانپتی ہے سنیں ذرا دل خراش چیخیں بنا رہی ہیں عجب ہیولے جو چادروں میں بھی ہیں برہنہ یہ کون ہیں جانتے تو ہوں گے حضور پہچانتے تو ہوں گے یہ لونڈیاں ہیں کہ یرغمالی حلال شب بھر رہے ہیں دم صبح در بدر ہیں حضور کے نطفہ کو مبارک کے نصف ورثہ سے بے معتبر ہیں یہ بیبیاں ہیں کہ زوجگی کا خراج دینے قطار اندر قطار باری کی منتظر ہیں یہ بچیاں ہیں کہ جن کے سر پر پھرا جو حضرت کا دست شفقت تو کم سنی کے لہو سے ریش سپید رنگین ہو گئی ہے حضور کے حجلۂ معطر میں زندگی خون رو گئی ہے پڑا ہوا ہے جہاں یہ لاشہ طویل صدیوں سے قتل انسانیت کا یہ خوں چکاں تماشہ اب اس تماشہ کو ختم کیجے حضور اب اس کو ڈھانپ دیجئے سیاہ چادر تو بن چکی ہے مری نہیں آپ کی ضرورت کہ اس زمیں پر وجود میرا نہیں فقط اک نشان شہوت حیات کی شاہ راہ پر جگمگا رہی ہے مری ذہانت زمین کے رخ پر جو ہے پسینہ تو جھلملاتی ہے میری محنت یہ چار دیواریاں یہ چادر گلی سڑی لاش کو مبارک کھلی فضاؤں میں بادباں کھول کر بڑھے گا مرا سفینہ میں آدم نو کی ہم سفر ہوں کہ جس نے جیتی مری بھروسہ بھری رفاقت
English rendering
Huzoor mein is siyah chadar ka kya karungi Ye aap kyon mujh ko bakhshte hain basad inayat Na sog mein hoon ke is ko odhoon Gham-o-alam khalq ko dikhaun Na rog hoon main ke is ki tareekiyon mein khiffat se doob jaun Na main gunahgaar hoon na mujrim Ke is siyahi ki mohar apni jabeen pe har haal mein lagaun Agar na gustaakh mujh ko samjhein Agar main jaan ki amaan paun To dast basta karun guzarish Ke Banda Parvar Huzoor ke hujra-e-muattar mein ek laasha pada hua hai Na jaane kab ka gala sada hai Ye aap se reham chahta hai Huzoor itna karam to keejiye Siyah chadar mujhe na deejiye Siyah chadar se apne hujre ki be-kafan laash dhaanp deejiye Ke is se phooti hai jo uffonat Woh koochay koochay mein haanpti hai Woh sar patakti hai chaukhaton par Barahnagi tan ki dhaanpti hai Sunein zara dil-kharaash cheikhain Bana rahi hain ajab hayole Jo chadaron mein bhi hain barahna Ye kaun hain jaante to honge Huzoor pehchante to honge Ye laundiyaan hain Ke yarghamaali halaal shab bhar rahe hain Dam-e-subh dar ba dar hain Huzoor ke nutfe ko mubarak ke nisf wirsa se be-moatabar hain Ye bibiyaan hain Ke zaujagi ka khiraaj dene Qataar andar qataar baari ki muntazir hain Ye bachiyaan hain Ke jin ke sar par phira jo hazrat ka dast-e-shafqat To kam-sani ke lahoo se reesh-e-safeed rangeen ho gayi hai Huzoor ke hujla-e-muattar mein zindagi khoon ro gayi hai Pada hua hai jahan ye laasha Taveel sadiyon se qatl-e-insaniyat ka ye khoon-chakaan tamasha Ab is tamasha ko khatm keejiye Huzoor ab is ko dhaanp deejiye Siyah chadar to ban chuki hai meri nahin aap ki zaroorat Ke is zameen par wujood mera nahin faqat ik nishaan-e-shahwat Hayaat ki shaah-raah par jagmaga rahi hai meri zehanat Zameen ke rukh par jo hai paseena to jhilmilati hai meri mehnat Ye chaar deewariyaan ye chadar gali sadi laash ko mubarak Khuli fizaaon mein baadbaan khol kar badhega mera safeena Main Aadam-e-Nau ki humsafar hoon Ke jis ne jeeti meri bharosa bhari rafaaqat