چادر اور چار دیواری — فہمیدہ ریاض

Chaadar aur chaar deewari

Huzoor mein is siyah chadar ka kya karungi
Ye aap kyon mujh ko bakhshte hain basad inayat
Na sog mein hoon ke is ko odhoon
Gham-o-alam khalq ko dikhaun
Na rog hoon main ke is ki tareekiyon mein khiffat se doob jaun
Na main gunahgaar hoon na mujrim
Ke is siyahi ki mohar apni jabeen pe har haal mein lagaun
Agar na gustaakh mujh ko samjhein
Agar main jaan ki amaan paun
To dast basta karun guzarish
Ke Banda Parvar
Huzoor ke hujra-e-muattar mein ek laasha pada hua hai
Na jaane kab ka gala sada hai
Ye aap se reham chahta hai
Huzoor itna karam to keejiye
Siyah chadar mujhe na deejiye
Siyah chadar se apne hujre ki be-kafan laash dhaanp deejiye
Ke is se phooti hai jo uffonat
Woh koochay koochay mein haanpti hai
Woh sar patakti hai chaukhaton par
Barahnagi tan ki dhaanpti hai
Sunein zara dil-kharaash cheikhain
Bana rahi hain ajab hayole
Jo chadaron mein bhi hain barahna
Ye kaun hain jaante to honge
Huzoor pehchante to honge
Ye laundiyaan hain
Ke yarghamaali halaal shab bhar rahe hain
Dam-e-subh dar ba dar hain
Huzoor ke nutfe ko mubarak ke nisf wirsa se be-moatabar hain
Ye bibiyaan hain
Ke zaujagi ka khiraaj dene
Qataar andar qataar baari ki muntazir hain
Ye bachiyaan hain
Ke jin ke sar par phira jo hazrat ka dast-e-shafqat
To kam-sani ke lahoo se reesh-e-safeed rangeen ho gayi hai
Huzoor ke hujla-e-muattar mein zindagi khoon ro gayi hai
Pada hua hai jahan ye laasha
Taveel sadiyon se qatl-e-insaniyat ka ye khoon-chakaan tamasha
Ab is tamasha ko khatm keejiye
Huzoor ab is ko dhaanp deejiye
Siyah chadar to ban chuki hai meri nahin aap ki zaroorat
Ke is zameen par wujood mera nahin faqat ik nishaan-e-shahwat
Hayaat ki shaah-raah par jagmaga rahi hai meri zehanat
Zameen ke rukh par jo hai paseena to jhilmilati hai meri mehnat
Ye chaar deewariyaan ye chadar gali sadi laash ko mubarak
Khuli fizaaon mein baadbaan khol kar badhega mera safeena
Main Aadam-e-Nau ki humsafar hoon
Ke jis ne jeeti meri bharosa bhari rafaaqat