اس آئنے میں دیکھنا حیرت بھی آئے گی — اقبال ساجد
شاعر
اس آئنے میں دیکھنا حیرت بھی آئے گی
اس آئنے میں دیکھنا حیرت بھی آئے گی
اک روز مجھ پہ اس کی طبیعت بھی آئے گی
قدغن لگا نہ اشکوں پہ یادوں کے شہر میں
ہوگا اگر تماشا تو خلقت بھی آئے گی
میں آئنہ بنوں گا تو پتھر اٹھائے گا
اک دن کھلی سڑک پہ یہ نوبت بھی آئے گی
موسم اگر ہے سرد تو پھر آگ تاپ لے
چمکے گی آنکھ خوں میں حرارت بھی آئے گی
کچھ دیر اور شاخ پہ رہنے دے صبر کر
پکنے دے پھل کو کھانے میں لذت بھی آئے گی
آنکھیں ہیں تیرے پاس تو پھر سطح آب پر
گہرائی سے ابھر کے عبارت بھی آئے گی
نکلیں چراغ ہاتھ میں لے کر گھروں سے لوگ
سورج کی رہ میں منزل ظلمت بھی آئے گی
یہ جانتا تو کاٹتا ساجدؔ نہ سائے کو
تلوار پر لہو کی تمازت بھی آئے گی
اقبال ساجد
Is aaine mein dekhna hairat bhi aayegi
Is aaine mein dekhna hairat bhi aayegi
Ek roz mujh pe us ki tabiyat bhi aayegi
Qadghan laga na ashkon pe yaadon ke shahr mein
Hoga agar tamasha to khilqat bhi aayegi
Main aaina banunga to patthar uThayega
Ek din khuli saRak pe ye naubat bhi aayegi
Mausam agar hai sard to phir aag taap le
Chamkegi aankh khoon mein hararat bhi aayegi
Kuch der aur shakh pe rehne de sabr kar
Pakne de phal ko khane mein lazzat bhi aayegi
Aankhen hain tere paas to phir sat'h-e-aab par
Gehraai se ubhar ke ibarat bhi aayegi
Niklen chiragh haath mein le kar gharon se log
Suraj ki rah mein manzil-e-zulmat bhi aayegi
Ye jaanta to kaat ta Sajid na saye ko
Talwar par lahu ki tamazat bhi aayegi
شاعر کے بارے میں
اقبال ساجد اردو کے معروف جدید غزل گو شعرا میں شمار ہوتے ہیں جن کا اصل نام محمد اقبال تھا۔ وہ 18 مئی 1932 کو لنڈھورا، ضلع سہارنپور (بھارت) میں پیدا ہوئے اور تقسیمِ ہند کے بعد پاکستان آکر لاہور میں مقیم ہوگئے۔ سادگی، داخلیت اور گہرے انسانی شعور نے ان کی شاعری کو معاصر شعرا سے ممتاز کیا۔ اگرچہ وہ صرف میٹرک تک تعلیم حاصل کرسکے، لیکن مطالعے، مشاہدے ...
مکمل تعارف پڑھیں