سورج ہوں زندگی کی رمق چھوڑ جاؤں گا — اقبال ساجد
شاعر
سورج ہوں زندگی کی رمق چھوڑ جاؤں گا
سورج ہوں زندگی کی رمق چھوڑ جاؤں گا
میں ڈوب بھی گیا تو شفق چھوڑ جاؤں گا
تاریخ کربلائے سخن! دیکھنا کہ میں
خون جگر سے لکھ کے ورق چھوڑ جاؤں گا
اک روشنی کی موت مروں گا زمین پر
جینے کا اس جہان میں حق چھوڑ جاؤں گا
روئیں گے میری یاد میں مہر و مہ و نجوم
ان آئنوں میں عکس قلق چھوڑ جاؤں گا
وہ اوس کے درخت لگاؤں گا جا بہ جا
ہر بوند میں لہو کی رمق چھوڑ جاؤں گا
گزروں گا شہر سنگ سے جب آئنہ لیے
چہرے کھلے دریچوں میں فق چھوڑ جاؤں گا
پہنچوں گا صحن باغ میں شبنم رتوں کے ساتھ
سوکھے ہوئے گلوں میں عرق چھوڑ جاؤں گا
ہر سو لگیں گے مجھ سے صداقت کے اشتہار
ہر سو محبتوں کے سبق چھوڑ جاؤں گا
ساجدؔ گلاب چال چلوں گا روش روش
دھرتی پہ گلستان شفق چھوڑ جاؤں گا
اقبال ساجد
Suraj hun zindagi ki ramaq chhoD jaunga
Suraj hun zindagi ki ramaq chhoD jaunga
Main doob bhi gaya to shafaq chhoD jaunga
Tarikh-e-Karbala-e-sukhan! Dekhna ke main
Khoon-e-jigar se likh ke waraq chhoD jaunga
Ek roshni ki maut marunga zameen par
Jeene ka is jahan mein haq chhoD jaunga
Roenge meri yaad mein mehr-o-mah-o-anjum
In aainon mein aks-e-qalaq chhoD jaunga
Wo os ke darakht lagaunga ja ba ja
Har boond mein lahu ki ramaq chhoD jaunga
Guzrunga shahr-e-sang se jab aaina liye
Chehre khule dareechon mein faqq chhoD jaunga
Pahunchoonga sahn-e-baagh mein shabnam ruton ke saath
Sookhe hue gulon mein araq chhoD jaunga
Har su lagenge mujh se sadaqat ke ishtihar
Har su muhabbaton ke sabaq chhoD jaunga
Sajid gulab chaal chalunga rawish rawish
Dharti pe gulistan-e-shafaq chhoD jaunga
شاعر کے بارے میں
اقبال ساجد اردو کے معروف جدید غزل گو شعرا میں شمار ہوتے ہیں جن کا اصل نام محمد اقبال تھا۔ وہ 18 مئی 1932 کو لنڈھورا، ضلع سہارنپور (بھارت) میں پیدا ہوئے اور تقسیمِ ہند کے بعد پاکستان آکر لاہور میں مقیم ہوگئے۔ سادگی، داخلیت اور گہرے انسانی شعور نے ان کی شاعری کو معاصر شعرا سے ممتاز کیا۔ اگرچہ وہ صرف میٹرک تک تعلیم حاصل کرسکے، لیکن مطالعے، مشاہدے ...
مکمل تعارف پڑھیں