آنکھوں میں بس کے دل میں سما کر چلے گئے — جگر مراد آبادی
شاعر
آنکھوں میں بس کے دل میں سما کر چلے گئے
آنکھوں میں بس کے دل میں سما کر چلے گئے
خوابیدہ زندگی تھی جگا کر چلے گئے
حسن ازل کی شان دکھا کر چلے گئے
اک واقعہ سا یاد دلا کر چلے گئے
چہرے تک آستین وہ لا کر چلے گئے
کیا راز تھا کہ جس کو چھپا کر چلے گئے
رگ رگ میں اس طرح وہ سما کر چلے گئے
جیسے مجھی کو مجھ سے چرا کر چلے گئے
میری حیات عشق کو دے کر جنون شوق
مجھ کو تمام ہوش بنا کر چلے گئے
سمجھا کے پستیاں مرے اوج کمال کی
اپنی بلندیاں وہ دکھا کر چلے گئے
اپنے فروغ حسن کی دکھلا کے وسعتیں
میرے حدود شوق بڑھا کر چلے گئے
ہر شے کو میری خاطر ناشاد کے لیے
آئینۂ جمال بنا کر چلے گئے
آئے تھے دل کی پیاس بجھانے کے واسطے
اک آگ سی وہ اور لگا کر چلے گئے
آئے تھے چشم شوق کی حسرت نکالنے
سر تا قدم نگاہ بنا کر چلے گئے
اب کاروبار عشق سے فرصت مجھے کہاں
کونین کا وہ درد بڑھا کر چلے گئے
شکر کرم کے ساتھ یہ شکوہ بھی ہو قبول
اپنا سا کیوں نہ مجھ کو بنا کر چلے گئے
لب تھرتھرا کے رہ گئے لیکن وہ اے جگرؔ
جاتے ہوئے نگاہ ملا کر چلے گئے
Aankhon mein bas ke dil mein sama kar chale gaye
Aankhon mein bas ke dil mein sama kar chale gaye
Khwabida zindagi thi jaga kar chale gaye
Husn-e-azal ki shaan dikha kar chale gaye
Ek waqea sa yaad dila kar chale gaye
Chehre tak aasteen woh la kar chale gaye
Kya raaz tha ke jis ko chhupa kar chale gaye
Rag rag mein is tarah woh sama kar chale gaye
Jaise mujhi ko mujh se chura kar chale gaye
Meri hayat-e-ishq ko de kar junoon-e-shauq
Mujh ko tamam hosh bana kar chale gaye
Samjha ke pastiyan mere auj-e-kamal ki
Apni bulandiyan woh dikha kar chale gaye
Apne farogh-e-husn ki dikhla ke wus'atein
Mere hudood-e-shauq badha kar chale gaye
Har shai ko meri khatir-e-nashaad ke liye
Aaina-e-jamal bana kar chale gaye
Aaye the dil ki pyaas bujhane ke waste
Ek aag si woh aur laga kar chale gaye
Aaye the chashm-e-shauq ki hasrat nikalne
Sar ta qadam nigah bana kar chale gaye
Ab karobar-e-ishq se fursat mujhe kahan
Kaunain ka woh dard badha kar chale gaye
Shukar-e-karam ke saath yeh shikwa bhi ho qubool
Apna sa kyun na mujh ko bana kar chale gaye
Lab tharthara ke reh gaye lekin woh ae Jigar
Jaate hue nigah mila kar chale gaye
شاعر کے بارے میں
جگر مرادآبادی اردو کے ممتاز کلاسیکی غزل نگار اور صوفی شاعر تھے، جن کا اصل نام علی سکندر تھا اور تخلص جگر مرادآبادی تھا۔ ان کی پیدائش چھ اپریل انیس ...
مکمل تعارف پڑھیں