عشق میں لا جواب ہیں ہم لوگ — جگر مراد آبادی
شاعر
عشق میں لا جواب ہیں ہم لوگ
عشق میں لا جواب ہیں ہم لوگ
ماہتاب آفتاب ہیں ہم لوگ
گرچہ اہل شراب ہیں ہم لوگ
یہ نہ سمجھو خراب ہیں ہم لوگ
شام سے آ گئے جو پینے پر
صبح تک آفتاب ہیں ہم لوگ
ہم کو دعوائے عشق بازی ہے
مستحق عذاب ہیں ہم لوگ
ناز کرتی ہے خانہ ویرانی
ایسے خانہ خراب ہیں ہم لوگ
ہم نہیں جانتے خزاں کیا ہے
کشتگان شباب ہیں ہم لوگ
تو ہمارا جواب ہے تنہا
اور تیرا جواب ہیں ہم لوگ
تو ہے دریائے حسن و محبوبی
شکل موج و حباب ہیں ہم لوگ
گو سراپا حجاب ہیں پھر بھی
تیرے رخ کی نقاب ہیں ہم لوگ
خوب ہم جانتے ہیں اپنی قدر
تیرے نا کامیاب ہیں ہم لوگ
ہم سے غفلت نہ ہو تو پھر کیا ہو
رہرو ملک خواب ہیں ہم لوگ
جانتا بھی ہے اس کو تو واعظ
جس کے مست و خراب ہیں ہم لوگ
ہم پہ نازل ہوا صحیفۂ عشق
صاحبان کتاب ہیں ہم لوگ
ہر حقیقت سے جو گزر جائیں
وہ صداقت مآب ہیں ہم لوگ
جب ملی آنکھ ہوش کھو بیٹھے
کتنے حاضر جواب ہیں ہم لوگ
ہم سے پوچھو جگرؔ کی سر مستی
محرم آں جناب ہیں ہم لوگ
Ishq meñ lā-jawāb haiñ ham log
Ishq meñ lā-jawāb haiñ ham log
Mahtāb āftāb haiñ ham log
Garche ahl-e-sharāb haiñ ham log
Ye na samjho ḳharāb haiñ ham log
Shām se aa ga.e jo piine par
Sub.h tak āftāb haiñ ham log
Ham ko da'vā-e-ishq-bāzī hai
Mustahaq-e-azāb haiñ ham log
Nāz kartī hai ḳhāna-vīrānī
Aise ḳhāna-ḳharāb haiñ ham log
Ham nahīñ jānte ḳhizāñ kyā hai
Kushtagān-e-shabāb haiñ ham log
Tū hamārā jawāb hai tanhā
Aur terā jawāb haiñ ham log
Tū hai dariyā-e-husn o mahbūbī
Shakl-e-mauj o habāb haiñ ham log
Go sarāpā hijāb haiñ phir bhī
Tere ruḳh kī niqāb haiñ ham log
Khūb ham jānte haiñ apnī qadr
Tere nā-kāmyāb haiñ ham log
Ham se ġhaflat na ho to phir kyā ho
Rahrav-e-mulk-e-ḳhwāb haiñ ham log
Jāntā bhī hai is ko tū wā'iz
Jis ke mast o ḳharāb haiñ ham log
Ham pe nāzil huā sahīfa-e-ishq
Sāhibān-e-kitāb haiñ ham log
Har haqīqat se jo guzar jā.eñ
Vo sadāqat-ma'āb haiñ ham log
Jab milī āñkh hosh kho baiThe
Kitne hāzir-jawāb haiñ ham log
Ham se pūchho jigar kī sar-mastī
Mahram āñ janāb haiñ ham log
شاعر کے بارے میں
جگر مرادآبادی اردو کے ممتاز کلاسیکی غزل نگار اور صوفی شاعر تھے، جن کا اصل نام علی سکندر تھا اور تخلص جگر مرادآبادی تھا۔ ان کی پیدائش چھ اپریل انیس ...
مکمل تعارف پڑھیں