کبھی شاخ و سبزہ و برگ پر کبھی غنچہ و گل و خار پر — جگر مراد آبادی
شاعر
کبھی شاخ و سبزہ و برگ پر کبھی غنچہ و گل و خار پر
کبھی شاخ و سبزہ و برگ پر کبھی غنچہ و گل و خار پر
میں چمن میں چاہے جہاں رہوں مرا حق ہے فصل بہار پر
مجھے دیں نہ غیظ میں دھمکیاں گریں لاکھ بار یہ بجلیاں
مری سلطنت یہ ہی آشیاں مری ملکیت یہ ہی چار پر
جنہیں کہئے عشق کی وسعتیں جو ہیں خاص حسن کی عظمتیں
یہ اسی کے قلب سے پوچھئے جسے فخر ہو غم یار پر
مرے اشک خوں کی بہار ہے کہ مرقع غم یار ہے
مری شاعری بھی نثار ہے مری چشم سحر نگار پر
عجب انقلاب زمانہ ہے مرا مختصر سا فسانہ ہے
یہی اب جو بار ہے دوش پر یہی سر تھا زانوئے یار پر
یہ کمال عشق کی سازشیں یہ جمال حسن کی نازشیں
یہ عنایتیں یہ نوازشیں مری ایک مشت غبار پر
مری سمت سے اسے اے صبا یہ پیام آخر غم سنا
ابھی دیکھنا ہو تو دیکھ جا کہ خزاں ہے اپنی بہار پر
یہ فریب جلوہ ہے سر بسر مجھے ڈر یہ ہے دل بے خبر
کہیں جم نہ جائے تری نظر انہیں چند نقش و نگار پر
میں رہین درد سہی مگر مجھے اور چاہئے کیا جگرؔ
غم یار ہے مرا شیفتہ میں فریفتہ غم یار پر
Kabhī shāḳh o sabza o barg par kabhī ġhunca o gul o ḳhār par
Kabhī shāḳh o sabza o barg par kabhī ġhunca o gul o ḳhār par
Maiñ chaman meñ chāhe jahāñ rahūñ mirā haq hai fasl-e-bahār par
Mujhe deñ na ghaiẓ meñ dhamkiyāñ gireñ lākh baar ye bijliyāñ
Mirī saltanat ye hī āshiyāñ mirī milkiyat ye hī chār par
Jinheñ kahiye ishq kī wus'ateñ jo haiñ ḳhās husn kī azmateñ
Ye isī ke qalb se pūchhiye jise faḳhr ho ġham-e-yār par
Mere ashk-e-ḳhūñ kī bahār hai ki muraqqa'-e-ġham-e-yār hai
Mirī shā'irī bhī nisār hai mirī chashm-e-sahar-nigār par
Ajab inquilāb-e-zamāna hai mirā muḳhtasar sā fasāna hai
Yahī ab jo bār hai dosh par yahī sar thā zānu-e-yār par
Ye kamāl-e-ishq kī sāzisheñ ye jamāl-e-husn kī nāzisheñ
Ye ināyateñ ye nawāzisheñ mirī ek musht-e-ġhubār par
Mirī samt se use ai sabā ye payām-e-āḳhir-ġham sunā
Abhī dekhnā ho to dekh jā ki ḳhizāñ hai apnī bahār par
Ye fareb-e-jalva hai sar ba-sar mujhe ḍar ye hai dil-e-be-ḳhabar
Kahiñ jam na jā.e tirī nazar inheñ chand naqsh o nigār par
Maiñ rahīn-e-dard sahī magar mujhe aur chāhiye kyā jigar
Ġham-e-yār hai mirā shaifta maiñ farefta ġham-e-yār par
شاعر کے بارے میں
جگر مرادآبادی اردو کے ممتاز کلاسیکی غزل نگار اور صوفی شاعر تھے، جن کا اصل نام علی سکندر تھا اور تخلص جگر مرادآبادی تھا۔ ان کی پیدائش چھ اپریل انیس ...
مکمل تعارف پڑھیں